Dzıýdodan Qazaqstan jastar quramasy Eýropa kýboginde 9 medal jeńip aldy

ASTANA. KAZINFORM — Qazaqstan jastar quramasy Portýgalııanyń Anadııa qalasynda dzıýdodan ótken Eýropa kýboginde 9 medal jeńip aldy.

Qazaqstan dzıýdo federatsııasynan málim etkenindeı, atalǵan jarysta qazaqstandyq jas tatamı sheberleri 1 altyn, 4 kúmis, 4 qola júldege ıe boldy.

Atap aıtqanda, Talǵat Orynbasar (60 kg) chempıon atansa, Azat Kúmisbaı (81 kg), Nurjan Bısenov (90 kg), Dinasyl Táttimbek (-100 kg) jáne Jantilek Nurtilepuly (+100 kg) kúmis júldemen marapattaldy. Oǵan qosa Aldııar Qarǵulov (60 kg), Gleb Azarov (81 kg), Asqar Birjanov (90 kg) jáne Nuraılym Sársenbek (52 kg) úzdik úshtikke kirdi.

Eýropa kýbogi qorytyndysynda Qazaqstan jastar quramasy jalpy medal kestesinde 17 el ishinde 5-orynǵa turaqtady.

Eske sala keteıik, budan buryn dzıýdodan Tbılısıdegi Grand Slam týrnırinde Qazaqstannyń úzdik ondyqqa engenin jazǵan bolatynbyz.