Dzıýdodan Qazaqstan quramasy Eýropa kýbogynda baq synaıdy

ASTANA. KAZINFORM - Dzıýdodan Qazaqstan quramasy Horvatııanyń Dýbrovnık qalasynda ótetin Eýropa kýbogyna qatysady.

Bul jóninde Qazaqstan Ulttyq Olımpıada komıteti málim etti.

Halyqaralyq dzıýdo federatsııasy (IJF) jarııalaǵan sportshylardyń aldyn ala tizimine barlyǵy toǵyz sportshy engizilgen. Oǵan elimizdiń erler jáne áıelder quramalary qatysady. Olardyń qatarynda Damır Bolatbekov (60 keli), Qanat Seıilhan (66 keli), Danııar Shamshaev, Aıbek Jaqashov (73 keli), Qanat Ábituly (81 keli), Dıdar Hamza (90 keli), Ermuhan Estaı (100 keli) bar.

Al áıelder quramasynda Symbat Taǵaı (48 keli) jáne Tolqyn Tursynaqynova (78 keli) el namysyn qorǵaıdy.

Eýropa kýbogy 28-29 naýryz kúnderi ótkiziledi.

Eske salsaq, budan buryn Grýzııa astanasy Tbılısı qalasynda ótetin dzıýdodan álemdik Grand Slam jarysyna qatysatyn Qazaqstan quramasy belgili boldy.

Tatamı tórinde 53 elden kelgen 424 sportshy qatysady dep josparlanǵan. Bedeldi báseke 20-22 naýryz kúnderi ótkiziledi.

Oǵan Qazaqstan erler quramasy tolyq qurammen qatysady.