Dzıýdodan Qazaqstan qurama komandasy Álem birinshiliginde birde-bir medalge qol jetkize almady
ALMATY. QazAqparat- Dzıýdodan Qazaqstan qurama komandasy Reseıdiń Chelıabınsk qalasynda ótip jatqan Álem birinshiliginde birde-bir medalge qol jetkize almady. Bul birinshilikke jattyqtyrýshylar shtaby ulttyq quramanyń ekinshi jáne úshinshi nómirli dzıýdoshylaryn alyp barǵan bolatyn, - dep habarlaıdy Qazaqstannyń dzıýdo federatsııasynyń baspasóz qyzmeti.
Buǵan deıin jýrnalısterge bergen suhbatynda dzıýdodan Ulttyq qurama komandanyń bas bapkeri Ermek Imambekov: «Biz úshin bıylǵy jyldyń basty saıysy - Ońtústik Koreıanyń Inchhon qalasynda ótetin (19 qyrkúıek - 4 qazan) Azııa oıyndary ǵoı. Oǵan elimizdiń eń myqty degen aıtýly dzıýdoshylaryn alyp baramyz. Degenmen, qalaı bolǵanda bul Álem birinshiliginde qaısysynan bolmasyn eki medaldi jeńip alý josparymyzda bar. Onyń birin, Maksım Rakov ákelýi tıis. Óıtkeni jattyqtyrýshylar shtaby oǵan úlken senim artyp otyr. Onyń «Álemdik» doda men «Azııa oıyndarynda» da jetistikke jetýine múmkindigi zor» - degen bolatyn. Alaıda, 100 kelige deıingi salmaq dárejesindegi 2009 jylǵy Álem chempıony jerebe boıynsha alǵashqy beldesýde ataqty mońǵol balýany Tývshınbaıar Naıdanmen kezdesti. 2008 jylǵy Pekın Olımpıadasynyń fınalynda otandasymyz Ashat Jitkeev osy jigitke ese jiberip alǵan bolatyn. Keıin Naıdan London Olımpıadasynyń fınalynda reseılik Tagır Haıbýlaevtan jeńilip, kúmis júldege ıe bolǵandy. Bul joly tájirıbeli mońǵol balýany shabýylǵa shyqpaı, urymtal sátti ańdýmen boldy. Otandasymyz qansha jerden belsendilik tanytyp, alǵa umtylǵanymen oń nátıjege qol jetkize almady. Negizgi ýaqyt 0:0 esebimen aıaqtaldy. Qosymsha ýaqytta Tývshınbaıar «ıýko» jasap, «altyn upaıǵa qol jetkizdi. Esep 0:1. Rakov Álem chempıonatynyn tys qaldy. Onymen qatar, qurama komandanyń basqa barlyq múshesi de jeke saıysta jeńiliske ushyrady. Osylaısha, dzıýdodan jeke saıystardyń qorytyndysy boıynsha Japonııa quramasy birinshi oryndy jeńip aldy. Kúnshyǵys eliniń qorjynynda 4 altyn, 2 kúmis jáne 3 qola medal. Ekinshi orynǵa kóterilgen Frantsııa qurama komandasy 2 altyn, 1 kúmis jáne 4 qola medalge ıe boldy. Al úshinshi orynda qatarynan eki komanda: Brazılııa men Kýba komandasy ornalasty. Olarda 1 altyn, 1 kúmis jáne 2 qola medalden. Reseı komandasy 2 kúmis jáne 6 qola medalmen 11 orynǵa turaqtady.
Búgin chempıonattyń sońǵy kúni. Dál qazir komandalyq jarystar ótip jatyr. Oǵan 16 erler komandasy men 16 áıelder arasyndaǵy komandalar qatysýda. Búgin keshke Chempıonattyń jabylý rásimine baǵdarlama boıynsha, Reseı Prezıdenti Vladımır Pýtınniń qatysýy josparlanǵan. Onda Álem birinshiliginiń aýyspaly týy Qazaqstan delegatsııasyna tabys etiledi. Dzıýdodan kelesi «Álemdik» doda qazaq jerinde ótedi.
