Dzıýdodan Qazaqstan chempıonatynyń jeńimpazdary anyqtaldy

ATYRAÝ. QazAqparat - Atyraýda dzıýdodan erler jáne áıelder arasynda Qazaqstan chempıonaty aıaqtaldy. Jarystyń sońǵy kúni aralas komandalyq jarystar ótti. Bul týraly QazAqparat Ulttyq Olımpıada komıtetine silteme jasap habarlaıdy.

Halyqaralyq dzıýdo federatsııasynyń erejesi boıynsha, dzıýdoshylar alty salmaq dárejesinde beldesti (áıelder: -57 keli, -70 keli, +70 keli, erler -73 keli, -90 keli jáne +90 keli). Aralas komandalyq chempıonatqa barlyǵy 18 komanda qatysty.

Nátıjesinde fınalda Mańǵystaý oblysynan 4:3 esebimen basym túsken Jetisý oblysynyń komandasy chempıon atandy. Qola júldeni Atyraý jáne Almaty oblystarynyń tatamı sheberleri jeńip aldy.

2022 jylǵy Qazaqstan chempıonatynyń jekeleı synyna Astana, Almaty, Shymkent qalalary men 17 oblystan 500-ge jýyq sportshy qatysty. Aqtóbe oblysynyń tatamı sheberleri jekeleı synda 3 altyn, 1 qola medal jeńip alyp, medaldar kestesinde kósh bastady. Atyraý oblysynyń dzıýdoshylary 2 altyn, 2 kúmis, 3 qola medalmen ekinshi oryn alsa, Almaty qalasynyń komandasy 2 altyn, 1 kúmis, 2 qola medalmen úzdik úshtikti túıindedi.

Jarys qorytyndysy boıynsha jeńimpaz jáne júldeger atanǵan sportshylar ulttyq qurama sapyna alynyp, jańa maýsym quramy jasaqtalady.

Foto: olympic.kz