Dzıýdodan Qazaqstan chempıonatynyń altyn jáne kúmis júldegerleri dopıng qabyldady degen kúdikke ilindi
ASTANA. QazAqparat - Dopıngke qarsy ulttyq ortalyq zerthanalyq taldaýlardy negizge alyp, dopıngke qarsy erejelerdi buzdy degen kúdikke ilingen dzıýdoshylar Elaman Erǵalıev (Qyzylorda oblysy) jáne Salamat Jurqabaevty (Qyzylorda oblysy) halyqaralyq jáne respýblıkalyq jarystardan shettetý jóninde sheshim qabyldady. Bul týraly Qazaqstannyń dzıýdo federatsııasy Feısbýktegi áleýmettik jelisindegi paraqshasynda habarlady.
Qazaqstan Respýblıkasynyń chempıonatynda sportshylardan alynǵan dopıng baqylaýdyń «A» synamalarynan tyıym salynǵan sýbstantsııa anyqtalǵan.
«Biz «taza sportty» qoldaımyz. Qazirgi kezde Qazaqstannyń dzıýdo federatsııasy dopıngke nóldik tózimdilik qaǵıdasyn ustanyp, dopıngke qarsy erejelerdiń saqtalýyn erekshe qadaǵalap otyr. Bul taqyrypta jyl saıyn túrli semınarlar ótkizilýde.
Atalǵan fakti boıynsha múddeli vedomstvolar men federatsııa ishki tergeý amaldaryn júrgizýdi josparlap otyr. Tergeý nátıjesi boıynsha «B» synamasyn ashýǵa jáne apellıatsııa jasaýǵa ótinimin berý týraly sheshim qabyldanýy múmkin. Onyń qorytyndylary týraly Qazaqstannyń dzıýdo federatsııasynyń saıtynda habarlanady», - dedi QR Dzıýdo federatsııasynyń atqarýshy dırektory Samat Jylqybaev.
Eske sala keteıik, Astanada bıyl 13-16 qarasha kúnderi ótken el chempıonatynda dzıýdoshy Salamat Jurqabaev 81 kelige deıin salmaq dárejesinde Qazaqstan chempıony atansa, +100 keli salmaqta shyqqan Elaman Erǵalıev kúmis medal jeńip alǵan.
Eske sala ketsek, Qazaqstan Respýblıkasynyń dzıýdodan jasóspirimder quramasynyń sportshysy Rahmet Mahambette osyǵan uqsas jaǵdaı buǵan deıin (Atyraý oblysy) bolǵan. Sportshy 2018 jyldyń 14 shildesinde Gonkong qalasynda kadetter arasynda dzıýdodan ótken Azııa kýbogynda birinshi oryn ıelengen bolatyn.
