Dzıýdodan Qazaqstan chempıonaty: jarystyń ekinshi kúni kimder úzdik shyqty
ORAL. QazAqparat – Oraldaǵy tennıs ortalyǵynda erler men áıelder arasynda dzıýdodan ótip jatqan Qazaqstan chempıonatynda bes salmaq dárejesinde úzdik shyqqandar belgili boldy, dep habarlaıdy QazAqparat tilshisi.
Qazaqstan dzıýdo federatsııasy málim etkendeı, jarystyń ekinshi kúni áıelderden úsh, erlerden eki salmaqta jeńimpazdar anyqtaldy.
Áıelder arasynda 57 kg salmaqta shymkenttik Sevara Nıshanbaeva chempıon atansa, aqtóbelik Baqyt Qusaqbaeva kúmis, almatylyq Balnur Qurmanbaı men jambyldyq Raýza Nurmuhammetova qola júldege ıe boldy.
63 kelide almatylyq Saera Mırzahmetova jeńis tuǵyryna kóterilse, qostanaılyq Salamaı Erǵalıeva ekinshi, shyǵysqazaqstandyq Krıstına Sotnıkova men atyraýlyq Esimgúl Kýıýlova úshinshi orynnan kórindi.
70 kelide shyǵysqazaqstandyq Zere Bektasqyzy qarsylas shydatpady. Túrkistandyq Perızat Jaqypbekova kúmis, Almaty oblysynan kelgen Móldir Narynova men aqmolalyq Anastasııa Maıakova qola medaldi qanaǵat tutty.
Erler arasynda 73 kg salmaqta fınalda jambyldyq Danııar Shamshıevti súrindirgen qaraǵandylyq Jansaı Smaǵulov myqtylyǵyn taǵy bir dáleldedi. Shyǵysqazaqstandyq Erlan Serikjanov pen batysqazaqstandyq Ańsarbek Ǵaınýllın úzdik úshtikke ilikti.
Sondaı-aq 81 kelide jambyldyq Bekádil Shaımerdenovtiń mereıi ústem bolsa, qyzylordalyq Abylaıhan Jubanazar kúmis, shyǵysqazaqstandyq Baraq Arqabaı men shymkenttik Aıbol Nysanáli qola júldeni enshiledi.
Bıylǵy bir erekshelik, Olımpıada oıyndarynyń eki dúrkin júldegeri, álem chempıony Eldos Smetov óz qarajaty esebinen barlyq salmaq dárejesi boıynsha júldege ilikkenderge arnaıy aqshalaı syılyq belgilegen bolatyn. Atap aıtqanda, chempıonǵa 150 myń, kúmis júldegerge 100 myń, úshinshi oryn ıegerlerine 50 myńnan syıaqy berilýde.
Erteń taǵy bes salmaqta dzıýdoshylar tatamıge shyǵyp, chempıonat qorytyndylanatyn bolady.
Eske sala keteıik, budan buryn dzıýdodan Qazaqstan chempıonatynda alǵashqy jeńimpaz-júldegerler anyqtalǵanyn jazǵan bolatynbyz.
