Dzıýdodan Qazaqstan chempıonaty: Oralda alǵashqy jeńimpaz-júldegerler anyqtaldy
Qazaqstan dzıýdo federatsııasy málim etkenindeı, jarystyń birinshi kúni tórt salmaq dárejesinde myqtylar belgili boldy.
Erler arasynda 60 kg salmaqta qyzylordalyq Maǵjan Shamshadın chempıon atandy. Mańǵystaýlyq Baýyrjan Narbaev ekinshi, atyraýlyq Qanat Seıilhan men elordalyq Erjan Erenǵaıpov úshinshi orynǵa ıe boldy. 66 kelide fınalda shyǵysqazaqstandyq Dastan Shaıahmetovti utqan atyraýlyq Ermek Amangeldi úzdik shyqty. Taǵy bir atyraýlyq Aıbolat Ystybaı men shyǵysqazaqstandyq Almas Ǵalymov qola júldeni qanaǵat tutty.
Áıelder arasynda 48 keli salmaqta atyraýlyq Ábıba Ábýjaqynova jeńis tuǵyryna kóterilse, Almaty oblysynan kelgen Dıana Býrkeeva kúmispen kúpteldi. Túrkistandyq Sara Qulym men soltústikqazaqstandyq Dilnaz Asylhan úzdik úshtikke ilikti. 52 keli salmaqta batysqazaqstandyq Gaýhar Ermaǵambetova (bapkeri Qasym Qajenov) altyn medalmen marapattaldy. Qyzylordalyq Saltanat Sultanbekova ekinshi, Almaty qalasynan kelgen Dıana Aıpova men Almaty oblysynyń ókili Nursulý Erálıeva úshinshi orynnan kórindi.
Tokıo Olımpıadasynan keıin ótip jatqan el birinshiligi erteń de jalǵasady. Chempıonatqa 400-ge jýyq dzıýdoshy qatysýda.
Eske sala keteıik, budan buryn Oralda dzıýdodan Qazaqstan chempıonaty ótetinin jazǵan bolatynbyz.