Dzıýdodan Qazaqstan chempıonaty: Jetisý oblysynyń quramasy komandalyq jarysta jeńimpaz atandy
ORAL. KAZINFORM – Oral qalasyndaǵy «Jaıyq arena» sport kesheninde eresekter arasynda dzıýdodan Qazaqstan chempıonaty máresine jetti.
Jarystyń sońǵy kúni aralas-komandalyq jarystyń jeńimpaz-júldegerleri anyqtaldy.
Jetisý oblysynyń quramasy jartylaı fınalda Qaraǵandy komandasyn 4:1 esebimen utyp, sońǵy básekege joldama aldy.
Almaty qalasy men Qyzylorda oblysy arasyndaǵy ekinshi jartylaı fınal asa tartysty boldy. Munda almatylyqtar 4:3 esebimen jeńiske jetti.
Qola júlde úshin básekede qyzylordalyqtar BQO quramasyn 4:2 esebimen qapy qaldyrdy.
Ekinshi qola júldege qostanaılyqtardan 4:1 esebimen basym túsken qaraǵandylyqtar ıe boldy.
Fınalda Maǵjan Sqadyl men Aqerke Ramazanovanyń taza jeńisinen keıin almatylyqtar 2:0 esebimen alǵa shyqty. Áıtse de budan keıin jetisýlyqtar kambek jasaı bildi. Aldymen Baqjan Baıtas pen Janaıym Maratbek tarazy basyn teńestirdi. Sodan soń Darhan Qoıbaǵar men Móldir Narynova qarsylastaryn taza túsirdi. M.Narynova buǵan deıin 70 kelige deıingi salmaqta jekeleı synda da chempıon atanǵan edi.
Qorytyndy esep – 4:2, Jetisý oblysynyń paıdasynda.
Osylaısha, Qazaqstan quramasyna dzıýdoshylardy irikteý maqsatynda uıymdastyrylyp, tórt kúnge sozylǵan el chempıonaty aıaqtaldy.
Eske sala keteıik, budan buryn dzıýdodan Qazaqstan chempıonatynda aýyr salmaqtaǵy úzdikter anyqtalǵanyn jazǵan edik.
