Dzıýdodan Qazaqstan birinshiligi: jasóspirimder arasynda álem chempıony fınalǵa deıin jetti
ORAL. KAZINFORM — Oral qalasyndaǵy «Jaıyq arena» sport kesheninde eresekter arasynda dzıýdodan Qazaqstan chempıonaty alǵashqy jarys kúniniń jeńimpaz-júldegerleri anyqtaldy.
Áıelder arasynda 48 kelige deıingi salmaqta 2024 jyly Astanada Grand Slam álemdik týrnırinde top jarǵan almatylyq Ǵalııa Tynbaevaǵa teń keler eshkim bolǵan joq.
Dál osy salmaqta jasóspirimder arasynda álem chempıony, aqtóbelik Iıanat Jubatqan sensatsııa jasap, fınalǵa deıin irkilmeı jetti. Iıanat Jubatqan jýyrda ǵana Ekvadorda jasóspirimder arasynda ótken álem chempıonatynda komandalyq jarysta Brazılııamen básekede sheshýshi upaıǵa ıe bolyp, jeńimpaz atanǵan edi. Iıanat osy joly tek sońǵy básekede ǵana tájirıbeli qarsylasyna jol berdi.
Bul salmaqta túrkistandyq Ulbosyn Abdýkarımova men mańǵystaýlyq Aıaýlym Turdıke qola júldeger atandy.
Al 52 kelige deıingi salmaqta fınalda mańǵystaýlyq Merýert Sársenovany jeńgen Almaty oblysynyń ókili Arýjan Erejepova jeńis bıiginen kórindi.
Batysqazaqstandyq Aıshabıbi Muradımova men túrkistandyq Nurbala Zaınýl úzdik úshtikti túıindedi.
Erler arasynda 60 kelige deıingi salmaqta sońǵy beldesýde abaılyq Mádı Serikovti súrindirgen qyzylordalyq Nurdáýlet Meırambekovtyń baǵy jandy.
Taǵy bir qyzylordalyq Maǵjan Shamshadın men shymkenttik Dılshod Mırtýrsyn qola medaldi qanaǵat tutty.
Qyzylordalyq Erdáýlet Bozja 66 kelige deıingi salmaqta fınalda batysqazaqstandyq Nursultan Zaızaǵalıevti qosymsha ýaqytta ıýko ádisimen qapy qaldyrdy.
Aqtóbelik Danııar Qalmaǵambetov pen abaılyq Esentaı Imahanov qola júldege ıe boldy.
Qazaqstan chempıonaty 1 qyrkúıek kúni komandalyq jaryspen máresine jetedi.
Eske sala keteıik, budan buryn álem chempıony Fatıma Supyǵalıevanyń barsha qazaq elin qýantqany úshin baqyttymyn dep aıtqanyn jazǵan edik.
Sondaı-aq Aıbek Imashev dzıýdodan el namysyn eń myqtylar qorǵaıtynyn málimdedi.
