Dzıýdodan Grand Slam týrnıri: Qazaqstan alǵashqy jarys kúni júldesiz qaldy
ASTANA. KAZINFORM — Shveıtsarııanyń Lozanna qalasynda dzıýdodan ótip jatqan Grand Slam álemdik týrnıri Qazaqstan úshin sátsiz bastaldy.
Alǵashqy jarys kúni qazaqstandyqtardan 60 kelige deıingi salmaqta Sherzod Davlatov júldege jaqyn boldy.
Sherzod jarys barysynda aldymen amerıkalyq Krıstofer Velazkony ıpponmen utty. Sodan keıin frantsııalyq Romaın Pıkardy qapy qaldyrdy.
Al 1/16 fınalda shveıtsarııalyq Davıd Gaýhty taza jeńdi.
Sh.Davlatov shırek fınalda favorıtterdiń biri, Tokıo Olımpıadasynda qola, Parıjde jekeleı synda kúmis, komandalyq jarysta altyn alǵan frantsııalyq Lýka Mheıdzeden aılasyn asyrdy.
Alaıda jartylaı fınalda ońtústikkoreıalyq Harım Lıge ese jiberdi.
Qola júlde úshin básekede Sherzod Davlatovtyń ózbekstandyq Samarıddın Kýchkarovpen jekpe-jegi asa tartysty boldy. Tek qosymsha ýaqytta ǵana ózbekstandyq dzıýdoshy ıýko upaıymen jeńisti julyp aldy.
Osylaısha, Sh. Davlatov besinshi oryndy qanaǵat tutty.
Sondaı-aq 66 kelige deıingi salmaqta taǵy bir qazaqstandyq Aqyljan Jubatqanov jubanysh beldesýinde ońtústikkoreıalyq Chhanen Kımge jol berdi.
Eske sala keteıik, budan buryn Sherzod Davlatovtyń Olımpıada chempıonyn jeńip, Grand Slam týrnıriniń jartylaı fınalyna shyqqanyn jazǵan edik.
