Dzıýdodan erler ulttyq quramasynyń bas bapkeri aýysty
NUR-SULTAN. QazAqparat – Qazaqstannyń dzıýdodan erler ulttyq qurama komandasynyń bas bapkeri aýysty, dep habarlaıdy QazAqparat Olympic.kz saıtyna silteme jasap.
Málim etilgendeı, búgin Nur-Sultan qalasynda Qazaqstan dzıýdo federatsııasynyń kezekten tys otyrysy ótti. Jıyn Ulttyq federatsııa basshysy Qaırat Qojamjarovtyń jetekshiligimen ótti.
Onyń barysynda Qazaqstan ulttyq erler komandasyna jańa bas bapker taǵaıyndaldy. Atqarýshy komıtettiń biraýyzdan sheshimimen bul qyzmetke dzıýdodan QR-ǵa eńbegi sińgen bapker, joǵary sanatty jattyqtyrýshy, «Qurmet» ordeniniń ıegeri Ǵalymjan Jylgeldıev saılandy.
Aıta keterligi, quramanyń buryńǵy bapkeri Aıdyn Smaǵulov densaýlyǵyna baılanysty qyzmetin toqtatý týraly ótinish bildirdi. Ol Qazaqstan erler ulttyq quramasynyń bas bapkeri bolyp 2018 jyly saılanǵan bolatyn.
Óz kezeginde, Qazaqstan dzıýdo federatsııasynyń prezıdenti Qaırat Qojamjarov Aıdyn Smaǵulovqa osy ýaqytqa deıin atqarǵan jumysyna alǵys aıtyp, jańadan taǵaıyndalǵan bas bapkerge sáttilik tiledi.
Ǵalymjan Jylgeldıev 1970 jyly Jambyl oblysynda dúnıege kelgen. Bapkerlik qyzmetin 1987 jyly Jambyl oblysynyń balalar-jasóspirimder sport mektebinde bastaǵan. 2017 jyldan beri Qazaqstan erler ulttyq qurama komandasynyń jattyqtyrýshysy qyzmetin atqaryp keledi. Olımpıada oıyndarynyń kúmis júldegeri, dzıýdodan álem chempıony Eldos Smetovtyń jeke jattyqtyrýshysy.
