Dzıýdodan el namysyn eń myqtylar qorǵaıdy — Aıbek Imashev
ORAL. KAZINFORM — Oral qalasyndaǵy «Jaıyq arena» sport kesheninde eresekter arasynda dzıýdodan Qazaqstan chempıonaty ótip jatyr. Osyǵan oraı Kazinform tilshisi Qazaqstan dzıýdo federatsııasynyń bas hatshysy Aıbek Imashevpen tildesken edi.
— Aıbek Ásetuly, bul joly Qazaqstan chempıonatyn ótkizýdegi basty maqsat qandaı?
— Oral tórindegi erler men áıelder arasyndaǵy el birinshiliginiń qorytyndysy boıynsha 2027 jyly Qazaqstan namysyn qorǵaıtyn sportshylar irikteledi. Jeńimpazdar men júldegerler ulttyq quramaǵa iligip, jańa ádisteme, tyń tásildermen daıyndalady. Jattyqtyrýshylar quramynyń ózindik jospary bar. Soǵan sáıkes sportshylar sheteldegi oqý-jattyǵý jıyndarynda shyńdalyp, halyqaralyq jarystarǵa qatysady. Bapkerler olardyń aıaqalysyn baqylap, tıisti qorytyndy shyǵaryp otyrady.
Qazaqstan chempıonatyn ótkizý orny retinde Aq Jaıyqty tańdaýymyzdyń sebebi, óńirdiń áleýetin, sporttyq ınfraqurylymyn, BQO ákimdigi men dene shynyqtyrý jáne sport basqarmasynyń qoldaýyn eskerdik. Osy oraıda jergilikti federatsııany atap ótkim keledi. Jarys Halyqaralyq dzıýdo federatsııasynyń talaptaryna tolyq saı uıymdastyrylǵan. Bul birinshi ret emes, keıingi bes jylda tórt resmı chempıonat ótkizildi. Sonymen qatar alda kúntizbelik josparǵa sáıkes sambodan álem chempıony Asqar Shaıhıevtiń eske alýǵa arnalǵan respýblıkalyq jarys bar, onda chempıondarǵa sport sheberi ataǵy beriledi.
Oǵan qosa «Jaıyq arena» kóp salaly sport kesheni osyndaı dodalardy ótkizýde sportshylar úshin de, jan-jaqtan keletin kórermender úshin de qolaıly bolyp otyr.
— Oraldaǵy chempıonatqa biraz ataqty sportshylar qatysyp jatyr eken?
— Iá, olardyń arasynda álemdik jarysta júlde alyp júrgen tájirıbeli dzıýdoshylar az emes. Sonymen qatar bolashaǵynan úmit kúttiretin jastar da barshylyq. Kil myqtydan kim myqty, degendeı, eń myqtylar iriktelip shyǵady dep oılaımyz.
Bul birinshilikke jazǵy Azııa oıyndary men álem chempıonatyna baratyn sanaýly sportshylar qatyspaıdy. Olardyń birqatary Shveıtsarııanyń Lozanna qalasynda Grand Slam týrnırinde baq synap jatqany belgili.
Japonııa elinde jazǵy Azııa oıyndary aıasynda 29 qyrkúıek — 2 qazan aralyǵynda ótetin dzıýdo básekesinde Olımpıada chempıony Eldos Smetov bastaǵan sportshylarymyz atoı salady dep senemiz.
— Bıylǵy álem chempıonaty qaıda ótedi?
— Dzıýdodan álem chempıonaty 4-11 qazan aralyǵynda Ázerbaıjan astanasy Bakýde bolady. Azııa oıyndary men ekeýiniń arasy tyǵyz bolǵandyqtan, onda ekinshi quram baq synaıdy. Ár salmaqta básekelestikti arttyra túsý úshin jarystarǵa kim daıyn, solardy qosamyz. Bul rette sheteldik jáne ózimizdiń mamandar bar, bir ǵana faktor emes, sportshynyń jyl boıǵy eńbegi, oqý-jattyǵý jıyndaǵy júris-turysy, fızıkalyq, taktıkalyq, psıhologııalyq turǵydaǵy daıyndyǵy eskeriledi.
Los-Andjeleste ótetin Olımpıada oıyndaryna da kóp qalǵan joq. Sondyqtan reıtıngilik upaı beretin jarystarda sportshylar kezeń-kezeńmen, babyna qaraı baq synaıtyn bolady.
— Osy jarys aldynda erekshe qýanyshty oqıǵa boldy. Batysqazaqstandyq Fatıma Supyǵalıeva jasóspirimder arasynda qazaqstandyq qyzdar arasynda tuńǵysh ret álem chempıony atandy. Bul tarıhı jetistik qoı?
— Oǵan sóz bar ma, Fatıma Supyǵalıeva Aq Jaıyq qana emes, barsha qazaq elin qýantty dep oılaımyn. Oraldan shyqqan qazaqtyń qaradomalaq qyzy alǵash ret osyndaı tabysqa qol jetkizdi. Keıingi jetkinshekter ataqty sportshylarǵa qarap jigerlenedi, solardan úlgi alady. Jarystardy ótkizýdegi maqsat ta osy jerdegi sportty damytý men salaýatty ómir saltyn ornyqtyrýdan bólek, olımpıadalyq sport túri — dzıýdoǵa qyzyǵýshylyqty arttyra túsý dep bilemin. Budan tórt-bes jyl buryn Qazaqstan chempıonaty ótken kezde bozbala bolyp júrgenderdiń qazir ulttyq quramaǵa iligýi qýantady.
— Fatımany qosqanda, qazaqstandyqtar jasóspirimder arasyndaǵy álem chempıonatynda tórt altyn medaldi el qorjynyna saldy. Jańasha ádis-tásilder engizilip jatyr, sheteldik bapkerler tartyldy, munyń bári kóp jyldyq eńbektiń jemisi ǵoı?
— Árıne, keshendi top jumys jasap jatyr. Dzıýdoshylardyń sporttyq-medıtsınalyq daıyndyǵy bar, qarsylastary zerttelip, taldaý jasalady, sonyń bári óz jemisin berip jatyr. Jasóspirimderge qatysty aǵa keńesshi, belgııalyq Sedrık Taımans óte bilikti maman. Italııalyq maman Etsıo Gambanyń tájirıbesine súıene otyryp, biraz nárse jasaldy. Oǵan qosa bizdiń eńbek sińirgen jattyqtyrýshylar, jeke bapkerler bar. Mine, solardyń bári birigip jumys istese, nátıje de bolady dep esepteımin.
— Áńgimeńizge rahmet! Sportshylarymyzǵa tabys tileımiz.
Eske sala keteıik, budan buryn álem chempıony Fatıma Supyǵalıevanyń barsha qazaq elin qýantqany úshin baqyttymyn dep aıtqanyn jazǵan edik.
