Dzıýdodan Azııa kýbogy: Alǵashqy kúni qazaqstandyqtar úsh altynǵa qol jetkizdi

NUR-SULTAN. QazAqparat – Aqtaý qalasynda dzıýdodan Turar Joldybaevty eske alýǵa arnalǵan ashyq Azııa kýbogy ótýde, dep habarlaıdy QazAqparat tilshisi.

Qazaqstan dzıýdo federatsııasy málim etkenindeı, jarystyń alǵashqy kúni el quramasy 3 altyn, 4 qola júldemen komandalyq esepte ekinshi orynǵa kóterildi.

Medaldar kestesinde Reseı quramasy 3 altyn, 5 kúmis jáne 5 qola júldemen kósh bastady. Gonkong dzıýdoshylary 1 altyn, 1 qolamen úzdik úshtikti túıindep tur.

Qazaqstandyqtardan Anna Kazıýlına (52 kg), Iolanta Berdibekova (63 kg) jáne Eset Qýanov (66 kg) chempıon atandy.

Sondaı-aq Gúlzada Almaz (63 kg), Baýyrjan Narbaev (60 kg), Ábilqaıyr Máýlenın (66 kg) jáne Qýan Barys (73 kg) úshinshi orynǵa kóterildi.

Qazaqstan dzıýdo federatsııasynyń bas hatshysy Ashat Jıtkeevtiń aıtýynsha, Tokıo Olımpıadasy qarsańynda barlyq sportshylar úshin reıtıngilik upaılardyń mańyzy zor. Osy týrnırdiń jeńimpazdaryna 100, kúmis júldegerge 60, qola medal ıegerine 40 upaı beriledi.

Bul jarysqa Qazaqstannan áıelderdiń negizgi quramy tolyq qatysýda. Al erlerdiń kóshbasshylary jýyrda Býdapesht týrnırinde baq synap, aldaǵy álem chempıonatyna qyzý daıyndalyp jatqandyqtan, basqa dzıýdoshylarǵa múmkindik berildi.

Ashyq Azııa kýbogy 19 shilde kúni márege jetedi. Ótken jylǵa qaraǵanda, jarystyń aýqymy keńeıdi. Bıyl oǵan Azııa ǵana emes, Eýropa elderinen de sportshylar keldi.