Dzıýdodan Azııa chempıonaty: Qazaqstan quramasy 5-oryn aldy
NUR-SULTAN. QazAqparat - Dzıýdodan Qazaqstan quramasy Azııa chempıonatynyń aralas komandalyq jarysyn 5-orynmen aıaqtady, dep habarlaıdy QazAqparat tilshisi.
QR Dzıýdo federatsııasynyń baspasóz qyzmeti habarlaǵandaı, medal úshin kúreste qazaqstandyq dzıýdoshylar Qytaı quramasymen kezdesip, 4:2 esebimen jeńildi. Sheshýshi beldesýde qurama sapynda Islam Bozbaev pen Erasyl Qajybaev jeńiske jetse, Serik Aqylbek, Móldir Narynova, Zarına Raıfova, Sevara Nıshanbaevalar qarsylastaryna ese jiberdi.
Al aralas komandalyq jarysta Qazaqstan quramasy alǵashqy qarsylastary Taıpeı quramasyn 4:2 esebimen jeńdi. Nátıjesinde jartylaı fınalǵa shyǵyp, Ońtústik Koreıa quramasymen kezdesti.
Jartylaı fınalda Ońtústik Koreıa sportshylaryna 4:0 esebimen jeńilgen otandastarymyz jarystyń qola júldesi úshin kúresýge múmkindik alǵan bolatyn.
Alaıda sportshylarymyz jubanysh beldesýinde Qytaı quramasynan utylyp, Azııa chempıonatynyń aralas komandalyq jarysynda júldesiz qaldy.
Osylaısha dzıýdodan Qazaqstan ulttyq qurama komandasy Fýdjeırada ótken Azııa chempıonatyn 1 altyn, 2 kúmis jáne 3 qola júldemen jalpy komandalyq medal kestesinde 5-orynǵa turaqtady.
Erlan Serikjanov Azııa chempıonaty atansa, Galbadrah Otgontsetseg pen Eldos Jumaqanov kúmis júldege ıe boldy. Al Ǵusman Qyrǵyzbaev, Sevara Nıshanbaeva men Islam Bozbaev qurlyqtyq birinshiliktiń qola júldegerleri atandy.
