Dzıýdodan álem chempıonatynyń alǵashqy kúni qazaqstandyq úsh balýan saıysqa túsedi
ASTANA. QazAqparat - Búgin, 6 qazanda Ózbekstan astanasy -Tashkentte bastalatyn dzıýdodan álem chempıonatynda qazaqstandyq úsh balýan saıysqa túsedi, dep habarlaıdy QazAqparat tilshisi.
Dúbirli doda 6-13 qazan aralyǵynda ótedi. Onda elimizdiń atynan barlyǵy 17 sportshy qatysady. Onyń 9-y erler, 8-i áıelder arasynda synǵa túsedi.
Jarystyń alǵashqy kúninde erlerden Eldos Smetov, Maǵjan Shamshadın (ekeýi de 60 keli) jáne áıelderde Abıba Abýjaqynova (48 keli) tatamı tórinde tartysqa túsedi.
Eldos Smetov alǵashqy beldesýin 2021 jylǵy álem chempıonatynyń qola júldegeri atanǵan ázerbaıjandyq Karamat Hýseınovpen ótkizse, Maǵjan Shámshadın Andjelo Pantanomen sheberlik baıqasady.
Al Abıba Abýjaqynovanyń alǵashqy qarsylasy - brazılııalyq Amanda Lıma.
Іrikteý beldesýleri 6-13 qazan saǵat 11:30-da bastalyp, «Qazsport» telearnasynan tikeleı efırde kórsetiledi.
