Dzıýdodan ÁCh: Qazaqstan quramasy tuńǵysh ret tórtinshi orynǵa kóterildi
ALMATY. QazAqparat – Almatyda dzıýdodan jasóspirimder arasynda márege jetken álem chempıonatynda Qazaqstan quramasy jalpykomandalyq esepte tórtinshi orynǵa ıe boldy, dep habarlaıdy QazAqparat tilshisi.
Qazaqstandyqtar 1 altyn, 1 kúmis, 4 qola, barlyǵy alty medalmen 61 eldiń ishinen úzdik tórttikke ilikti.
Atap aıtqanda, Nurqanat Serikbaev altyn, Mádına Paragýlgova kúmis, Álıma Jumaǵalıeva, Ádil Márlen, Tilegen Tynarbaı jáne Aıdar Arapov qola júldeni enshiledi.
Qazaqstan jasóspirimder quramasynyń aǵa bapkeri Ǵaınolla Esenǵalıevtiń Olympic.kz saıtyna málim etkenindeı, alǵash ret osynshama medal el qorjynyna tústi.
Onyń sózine qaraǵanda, keıbir jasóspirimder qatelikter jiberdi. Degenmen olar jas, kadetter qatarynda áli de óner kórsetetin bolady.
Nurqanat Serikbaev tamasha kúresse, Mádına Paragýlgova úmitti aqtady. Basqalary da fınalǵa bir qadam jetpeı toqtady.
«Biz chempıonat qojaıyndary retinde qos quramany jarysqa qosa aldyq. Olımpıadalyq daıarlaý ortalyqtarynda jaqsy jumys atqaryldy. Qazaqstan dzıýdo federatsııasy tarapynan jan-jaqty qoldaýdy sezindik. 2017 jylǵy álem chempıonatynda Qazaqstan tek bir qola medal alǵan-dy. 2018 jylǵy jasóspirimder olımpıadasynda da júldesiz qalǵan joqpyz. Bul joly, mine, Qazaqstan jasóspirimder quramasy tarıhı nátıje kórsetip otyr. Endi 2003-2004 jylǵy jasóspirimderdi daıarlaıtyn bolamyz. Olardy iriktep, Azııa chempıonaty men «Azııa balalary» jarysyna daıyndalamyz», dedi álem chempıonatyn qorytyndylaǵan Ǵaınolla Esenǵalıev.
Jarystyń sońǵy kúni Qazaqstan quramasy aralas komandalyq jarysta birinshi kezdesýinde-aq Mońǵolııa dzıýdoshylarynan utylyp, júldeli oryndar úshin talasa almady.
Eske sala keteıik, budan buryn qazaqstandyq dzıýdoshynyń álem chempıonatynyń kúmis júldegeri atanǵanyn jazǵan bolatynbyz.
