Dzıýdodan 2027 jylǵy álem chempıonatynyń týy Qazaqstanǵa tabystaldy
ASTANA. KAZINFORM – Qazaqstan 2027 jyly Astanada ótetin dzıýdodan álem chempıonatynyń týyn qabyldady. Saltanatty rásim Ázerbaıjan astanasy Bakýde ótip jatqan álem birinshiligi aıasynda uıymdastyryldy.
Rásim barysynda Ázerbaıjan dzıýdo federatsııasynyń vıtse-prezıdenti Elnýr Mamedlı álem chempıonatynyń týyn Halyqaralyq dzıýdo federatsııasyna (IJF) qaıtardy.
Óz kezeginde IJF bas hatshysy Lıza Allan týdy Qazaqstan dzıýdo federatsııasynyń prezıdenti Qýanyshbek Esekeevke saltanatty túrde tabystady.
Dzıýdodan kelesi álem chempıonaty 2027 jyldyń 7-14 maýsymy aralyǵynda Astana qalasynda ótedi.
Bul doda 2028 jyly Los-Andjeleste ótetin Olımpıada oıyndaryna irikteý kezeńindegi mańyzdy jarystardyń biri sanalady. Álemniń úzdik dzıýdoshylary Olımpıada joldamasyna qol jetkizýge qajetti reıtıngtik upaılar úshin synǵa túsedi.
Qazaqstan dzıýdo federatsııasynyń prezıdenti Qýanyshbek Esekeev álem chempıonatyna daıyndyq barysynda jarysty joǵary deńgeıde uıymdastyrýǵa jáne ulttyq quramanyń daıyndyǵyna basymdyq beriletinin aıtty.
– Álem chempıonatyn Qazaqstanda ótkizý – halyqaralyq sport qaýymdastyǵynyń elimizge bildirgen seniminiń kórinisi. Bul bizge úlken jaýapkershilik júkteıdi. Bizdiń mindetimiz – jarysty Halyqaralyq dzıýdo federatsııasynyń talaptaryna saı ótkizý jáne ulttyq quramanyń daıyndyǵyn qamtamasyz etý. Úıde, jankúıerler aldynda beldesý sportshylarymyz úshin mańyzdy synaq bolmaq. Sondyqtan olardyń jattyǵýyna, halyqaralyq jarystarǵa qatysýyna jáne el namysyn abyroımen qorǵaýy úshin qajetti jaǵdaı jasaýǵa kóńil bólemiz. Aldaǵy chempıonat eldegi dzıýdonyń damýyna taǵy da úlken serpin beredi dep senemiz, – dedi Qýanyshbek Esekeev.
2027 jyly dzıýdodan álem chempıonaty araǵa 12 jyl salyp qaıtadan Qazaqstanda uıymdastyrylady. Buǵan deıin 2015 jyly Astana qalasy álem birinshiligin qabyldaǵan bolatyn.
Sonymen qatar Qazaqstan 2023-2026 jyldar aralyǵynda tórt jyl qatarynan Halyqaralyq dzıýdo federatsııasynyń resmı kúntizbesine engen Qazaqstan Barysy Grand Slam halyqaralyq týrnırin ótkizdi.
Atalǵan jarys Olımpıada oıyndaryna irikteý júıesinde mańyzdy ról atqarady. Týrnırge álemniń jetekshi dzıýdoshylary qatysyp, halyqaralyq reıtıngtegi upaılaryn tolyqtyrýǵa múmkindik aldy.
Osyndaı joǵary deńgeıdegi halyqaralyq jarystardyń Qazaqstanda turaqty uıymdastyrylýy elimizdiń álemdik dzıýdo arenasyndaǵy bedelin nyǵaıtyp, iri sporttyq is-sharalardy qabyldaý tájirıbesin arttyryp keledi.
Aıta keteıik, Bakýde ótken álem chempıonatynda qazaqstandyq Sherzod Davlatov 60 kelige deıingi salmaqta kúmis júldeger atanǵan bolatyn.
