Dzıýdo: Smetov pen Qyrǵyzbaev «Masters» týrnırinde júldesiz qaldy
NUR-SULTAN. QazAqparat – Qazaqstandyqtar Eldos Smetov pen Ǵusman Qyrǵyzbaev dzıýdodan Tsındaoda (Qytaı) ótip jatqan «Masters» týrnırinde júldesiz qaldy, dep habarlaıdy QazAqparat tilshisi.
E.Smetov pen Ǵ.Qyrǵyzbaev 60 kelige deıingi salmaqta qola júlde úshin beldesti.
Eldos jartylaı fınalda ıspanııalyq Frantsısko Garrıgostan utylyp qaldy. Sodan keıin kishi fınalda reseılik Robert Mshvıdobadzege ese jiberdi.
Ǵusman shırek fınalda otandasy E.Smetovke jol bergenimen, jubanysh beldesýinde ulybrıtanııalyq Eshlı Makkenzıdi tize búktirdi.
Sosyn qola júlde úshin básekede ózbekstandyq Sharafoddın Lýtfýllaevpen tatamıge shyqty. Buǵan deıin qarsylastar úsh márte kezdesip, sonyń ekeýinde ózbekstandyq dzıýdoshy utqan eken. Sonyń ishinde bıyl Tokıoda ótken álem chempıonatynyń jartylaı fınalynda Sh.Lýtfýllaevtyń basym túskeni belgili.
Bul joly Ǵ.Qyrǵyzbaev úsh márte eskertý alyp, jeńis qarsylasyna berildi.
Osylaısha E.Smetov pen Ǵ.Qyrǵyzbaev besinshi oryndy qanaǵat tutty.
Bul salmaqta fınalda F.Garrıgosty taza jeńgen álemdik reıtıngte kósh bastap turǵan japonııalyq Rıýdzıý Nagaıama chempıon atandy.
Tokıodaǵy álem chempıonatynda E.Smetov jartylaı fınalda dál osy R.Nagaıamadan utylyp, qola júlde úshin básekede otandasy Ǵ.Qyrǵyzbaevty jeńgen bolatyn.
Áıelder arasynda qazaqstandyq Otgontsetseg Galbadrah 48 kelige deıingi salmaqta jetinshi orynmen shekteldi.
Eske sala keteıik, budan buryn qazaqstandyq dzıýdoshylardyń Qytaıda ótetin týrnırge qatysatynyn jazǵan bolatynbyz.
