Dzıýdo: Rýslan Seıilhanov - álem chempıony
ASTANA. 28 qarasha. QazAqparat - AQSh-tyń Maıamı qalasynda dzıýdo kúresinen ardagerler arasyndaǵy álem chempıonaty aıaqtaldy.
Oǵan 46 memleketten kelgen 761 balýan qatysyp, túrli jas erekshelikteri boıynsha júldeni sarapqa saldy, dep habarlaıdy «Alaman» sport agenttigi.
Atalmysh jarysta Qazaqstannyń týy astynda óner kórsetken Rýslan Seıilhanov 100 keli salmaq dárejesi boıynsha beldesip, bas júldeni jeńip aldy. Bul esim jankúıerlerge jaqsy tanys. Shyǵys Qazaqstan oblysy Ulan aýdanynyń týmasy toqsanynshy jyldardyń basynda elimizdiń beldi samboshylarynyń biri boldy. Seıilhanov álem chempıonatynda eki márte júldeli oryndardy ıelenip, qurlyqtyq deńgeıdegi dodalarda qarsylas shaq keltirgen joq. Álem kýbogy jolyndaǵy jarysta dara shyqty. Keıinnen dzıýdo kúresine den qoıyp, 10 jylǵa jýyq ýaqyt túrli halyqaralyq jarystarda Qazaq eli namysyn abyroıly qorǵady. Qandasymyz Azııa oıyndary men Azııa chempıonattarynda júldeger atanyp, birqatar básekelerde aldyna jan salmady. 1996 jyly Atlantada jáne 2000 jyly Sıdneıde alaýy tutanǵan Olımpıada oıyndarynda baq synady. Sondaı-aq Rýslan qazaq kúresinen ótken kóptegen dúbirli dodalarda túıe balýan ataǵyn jeńip aldy.
Úlken sporttan qol úzse de, Rýslan babyn joǵaltqan joq. Jasy 40-tan assa da salaýatty ómir saltyn ustanyp, jattyǵý zalynda ter tógýde. Taıaýda ǵana Seıilhanov «Qazaqstan Barysy» dodasynda kúsh synasty. Bul jarysta oǵan júlde buıyrmaǵanymen, jankúıerlerdiń jyly lebizine bólendi. Al Maıamıde ótken jarystyń bastapqy básekelerde qarsylastaryn bet qaratpaı utqan qazaqtyń ór minezdi uly sheshýshi tusta AQSh balýany Pıter Adjabaktyń aıaǵyn kókten keltirdi. Sóıtip, qandasymyz álem chempıony ataǵyna qol jetkizdi.
Bul kúnderi Rýslan Seıilhanov Óskemen qalasynda Kedendik rásimdeý ortalyǵynda bas maman qyzmetin atqaryp júr.
Sondaı-aq atalmysh jarysta 66 keli salmaqta beldesken Málik Esenbaev pen asa aýyr salmaqta aıqasqan Sergeı Álimjanov altyn tuǵyrǵa kóterildi.
