Dzıýdo: Qazaqstandyqtar álem chempıonatynyń jekeleı synyn 2 medalmen aıaqtady
ASTANA. QazAqparat - Búgin Ózbekstan astanasy Tashkentte ótip jatqan dzıýdodan álem chempıonatynyń jekeleı syny óz máresine jetti, dep habarlaıdy QazAqparat tilshisi.
Tatamıde búgin Qazaqstan namysyn áıelder arasynda Kámıla Berliqash pen erlerden Erasyl Qajybaev qorǵady.
Ókinishke qaraı eki balýanymyz da qarsylasyna jol berip, jarysty júldesiz aıaqtady.
Naqtyraq aıtsaq, 78 kelige deıingi salmaqta synǵa túsken dzıýdoshy qyzymyz birinshi aınalymda qarsylasy nıderlandtyq Marıt Kempstan utyldy.
Al erler arasynda 100 keliden joǵary salmaqta tatamıge shyqqan Qajybaev ta alǵashqy aınalymnan aryǵa bara almady. Ol jergilikti balýan Alısher ıÝýsýpovtan utylyp qaldy.
Osylaısha Qazaqstan quramasy jekeleı syndaǵy jarysty aıaqtady.
Endi 13 qazan kúni komandalyq saıys ótedi.
Esterińizge sala keteıik, atalǵan álemdik dodada Qazaqstan namysyn 17 balýan (9-y erler, 8-i áıelder) qorǵady.
Nátıjesinde qazaqstandyq balýandar jekeleı synda jarysty 2 qola medalmen aıaqtady.
Onyń birin erler arasynda Ulttyq quramanyń kóshbasshysy 60 kelige deıingi salmaqta synǵa túsken Eldos Smetov jeńip alsa, ekinshi qolany áıelder arasynda 48 keli salmaqta synǵa túsken Ábıba Abýjaqynova enshiledi.
Sondaı-aq, Abýjaqynova osy jeńisiniń arqasynda qazaq qyzdary arasynan alǵash ret dzıýdodan álem chempıonatynyń júldegeri ataǵyna qol jetkizdi.
Foto:olympic.kz
