Dzıýdo: Qazaqstan komandasy Aýstrııa Gran-prıin 1 altyn, 1 qolamen aıaqtady

ASTANA. KAZINFORM - Aýstrııanyń Lınts qalasynda dzıýdodan Gran-prı týrnıri máresine jetti, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.

Qazaqstan quramasy jarysty 1 altyn, 1 qola medalmen aıaqtap, jalpykomandalyq esepte 7-oryn aldy. Lıntstegi básekede 21 eldiń sportshysy júldege ıe boldy.

Jarystyń alǵashqy kúni -60 kg salmaqta Sherzod Davlatov qola júldeger atandy. Al ekinshi kúni -81 kg salmaqta Ádilet Almat qarsylastaryna des bermeı, chempıon atandy. Bul – onyń Gran-prı sanatyndaǵy alǵashqy altyny.

Búgin Aqerke Ramazanova (+78 kg) qola medal úshin Estonııa sportshysyna jol berdi. Al -100 kg salmaqta Marat Baıkamýrov jubanysh kezeńinde Tokıo Olımpıadasynyń qola júldegeri, eki dúrkin álem chempıony Jorje Fonsekaǵa ese jiberdi.

Aýstrııadaǵy jarysqa 59 elden 479 dzıýdoshy qatysty. Qazaqstan quramasy sapynda 20 sportshy boldy.