Dzıýdo: Ǵalııa Tynbaeva Azııa chempıonatynda tuńǵysh ret júldeger atandy
ASTANA. KAZINFORM – Qytaıdyń Gonkong qalasynda ótip jatqan dzıýdodan Azııa chempıonatynda qazaqstandyq tatamı sheberi Ǵalııa Tynbaeva qola medal jeńip aldy.Bul onyń Azııa chempıonatynda jeńip alǵan alǵashqy júldesi.
48 keli salmaqta qola medal úshin beldesýde qos qazaqstandyq balýannyń joly túıisti.
Naqtyraq aıtsaq, Ǵalııa Tynbaeva men Ábıba Ábýjaqynova qola júldeni ózara sarapqa saldy. Nátıjesinde Tynbaeva sál basymdylyqpen jeńiske jetti.
Osylaısha Ábýjaqynova Saryqurlyq dodasyn júldesiz aıaqtady. Ol osyǵan deıin Bishkek (2021 jyl) pen Astanada (2022 jyl) ótken qurlyq chempıonatynda osy salmaqta kúmis júldege qol jetkizgen edi.
Atalǵan Saryqurlyq dodasynda 34 eldiń 262 tańdaýly tatamı sheberleri ózara kim myqtyny anyqtap jatyr.
Atalǵan birinshilikte erler arasynda 60 keli salmaqta Nurqanat Serikbaev pen Eldos Smetov synǵa tússe, 66 keli salmaqta Ǵusyman Qyrǵyzbaev pen Janarys Rahmetqalı el namysyn qorǵamaq. Al 73 keli salmaqta Danııar Shamshaev pen Asqar Narqulov beldesedi. 81 keli salmaqta Abylaıhan Jubanazar, -100 keli salmaqta Nurlyhan Sharhan, asa aýyr salmaqta Erasyl Qajybaev synǵa túsýde.
Al áıelder arasynda 48 keli salmaqta Ábıba Ábýjaqynova men Ǵalııa tynbaeva, 57 keli salmaqta Baqyt Qusaqbaeva synǵa túsedi. Sonymen qatar 63 keli salmaqta Esmıgúl Kýıýlova, 70 keli salmaqta Ekaterına Tokareva, -78 keli salmaqta Arýna Jangeldına men Margarıta Grıtsenko el namysyn qorǵamaq. Al asa aýyr salmaqta (+78) Kamıla Berliqash pen Aqerke Ramazanovaǵa úmit artamyz.
