Dzıýdo: Erlan Serikjanov Tel-Avıvte Gran-prı týrnıriniń kúmis júldegeri atandy
NUR-SULTAN. QazAqparat – Qazaqstandyq Erlan Serikjanov Tel-Avıvte (Izraıl) dzıýdodan ótip jatqan Gran-prı týrnıriniń kúmis júldegeri atandy, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, E.Serikjanov 66 kelige deıingi salmaqta fınalda Rıo Olımpıadasynyń kúmis júldegeri, ońtústikkoreıalyq An Baýlmen kúresti.
Ókinishke qaraı, Erlan sońǵy básekede qarsylasyna ese jiberdi.
E.Serikjanov jarys barysynda aldymen ıArın Menegedti (Izraıl) tize búktirse, sodan keıin Mýrad Shopanov (Reseı) pen Orhan Safarovty (Ázirbaıjan) utty. Al jartylaı fınalda tatamı ıesi Barýh Shmaılovti vazarı upaıymen jeńdi.
Osy salmaqta kúresken taǵy bir qazaqstandyq Eldos Jumaqanov birinshi beldesýinde Reda Seddoýkıdi (Frantsııa), sosyn Jaslın Sınh Saınıdi (Úndistan) joldan taıdyrdy. Al shırek fınalda B.Shmaılovqa ese jiberdi.
Jubanysh beldesýinde Orhan Safarovty (Ázirbaıjan) utqan Eldos qola júlde úshin tartysty básekede Izraıl eliniń taǵy bir ókili Tal Flıkkerden jeńilip qaldy. Sóıtip ol jarysty besinshi orynmen aıaqtady.
Álemniń 83 elinen 547 sportshy qatysyp jatqan Gran-prı dodasy 25 qańtarǵa deıin sozylady.
Eske sala keteıik, budan buryn Gran-prı týrnırinde el namysyn kimder qorǵaıtynyn jazǵan bolatynbyz.
Halyqaralyq dzıýdo federatsııasynyń (IJF) erejesi boıynsha lıtsenzııalyq Gran-prı jarysynyń jeńimpazdary men júldegerlerine álemdik reıtıngte upaı sandary qosylady. Jeńimpaz 700 upaıǵa ıe bolsa, ekinshi oryn alǵan sportshy - 490, úshinshi oryn ıegerine 350 upaıdan beriledi.
