Dzıýdo: Elorda tórinde Parıj Olımpıadasyna upaı úlestiretin sońǵy jarys ótedi

ASTANA. KAZINFORM – Dzıýdodan Parıj Olımpıadasyna upaı úlestiretin sońǵy álemdik Qazaqstan Barysy Grand Slam týrnıri Astana qalasynda Jaqsylyq Úshkempirov atyndaǵy jekpe-jek saraıynda ótedi.

Jarys 10-12 mamyr kúnderine josparlanǵan.

Qazirgi jarysqa 60-tan astam eldiń, sonyń ishinde álemdik reıtıng kóshbasshylary Japonııa, Ońtústik Koreıa, Frantsııa memleketteriniń sportshylary tirkelgen.

Esterińizge sala ketsek, bul dodanyń nátıjesinde IJF erejelerine sáıkes jarystyń jeńimpazdary men júldegerleri arasynda Álemdik jáne olımpıadalyq reıtıngterde upaılar bólinedi.

Atap aıtqanda, І oryn úshin 1000, ІІ oryn úshin – 700, al ІІІ oryn úshin – 500 upaı esepteletin bolady.

Qazaqstan dzıýdo federatsııasy men Halyqaralyq dzıýdo federatsııasynyń (IJF) eki jaqty kelisimshartyna sáıkes, Qazaqstan álemdik Grand Slam jarysyn 2026 jylǵa deıin qabyldaıdy.

Taǵy bir aıta keterligi, bul báseke 2024 jylǵy Parıj Olımpıadasyna reıtıngtik upaı beretin sońǵy Grand Slam jarysy bolmaq.

Jarys baǵdarlamasy:
10 mamyr
Áıelder: -48 kg, -52 kg, -57 kg
Erler: -60 kg, -66 kg

11 mamyr
Áıelder: -63 kg, -70 kg
Erler: -73 kg, -81 kg

12 mamyr
Áıelder: -78 kg, +78 kg
Erler: -90 kg, -100 kg, +100 kg.