Dzıýdo: El birinshiliginiń alǵashqy jeńimpazdary anyqtaldy
ASTANA. QazAqparat - Atyraýda 23 jasqa deıingi erler men áıelder arasynda dzıýdodan Qazaqstan chempıonaty ótip jatyr , dep habarlaıdy QazAqparat tilshisi.
Jarystyń alǵashqy kúni Qazaqstannyń ár aımaǵynan kelgen dzıýdoshylar 60 kg, 66 kg, 73 kg (erler) 48 kg, 52kg, 57 kg, 63 keli (áıelder) salmaq dárejesinde synǵa tústi.
Nátıjesinde erlerden 60 keli salmaqta Qaraǵandy oblysynyń balýany Qylysh Erenǵaıypov top jarsa, 66 keli salmaqta Mańǵystaý oblysynyń balýany Suńǵat Jubathan bas júldeni jeńip aldy. 73 keli salmaqta taǵy bir mańǵystaýlyq balýan Rýslan Mýsaevtiń baǵy jandy.
Al bilekti arýlardan 48 keli salmaqta Astana qalasynyń balýany Aqmaral Naýatbek jeńis tuǵyrynyń eń bıik satysynan kórinse, 52 keli salmaqta Almaty oblysnyń arýy Nursulý Eralıevanyń aıy ońynan týdy. 57 keli salmaqta taǵy bir astanalyq balýan Áıgerim Ábilqadirova jeńimpaz atansa, 63 keli salmaqtyń bas júldesin mańǵystaýlyq balýan Aqnıet Turdan qanjyǵasyna baılady.
Búgin, ıaǵnı Atyraýdaǵy Qazaqstan chempıonatynyń ekinshi kúninde 81 kg, 90 kg, 100 kg, +100 kg (erler), 70 kg, 78 kg, +78 kg (áıelder) salmaq dárejesinde baq synaıdy.
