Dzıýdo: Almatyda jasóspirimder arasyndaǵy álem chempıonaty bastaldy
ALMATY. QazAqparat – Búgin Almatyda dzıýdodan jasóspirimder arasyndaǵy álem chempıonatynyń alaýy jaǵyldy, dep habarlaıdy QazAqparat tilshisi.
Alataý bókterindegi «Balýan Sholaq» atyndaǵy sport saraıynda ótip jatqan álemdik dodanyń alǵashqy kúni, ıaǵnı búgin qyzdardan eki (40, 44 keli) salmaq sanatynda, uldardan eki (50, 55 keli) salmaq dárejelerinde alǵashqy irikteý aınalymdary bastalyp ketti.
Búgin jalpy, Qazaqstan namysyn 7 dzıýdoshy qorǵaıdy. Al, fınaldyq kezeń saǵat 16:00-ge josparlanǵan.
Esterińizge sala keteıik, Halyqaralyq dzıýdo federatsııasynyń kúntizbesine sáıkes ótetin álem birinshiliginde 17 jasqa deıingi jasóspirimder 16 salmaq dárejesinde baq synaıdy. Atalǵan birinshilikke álemniń 64 elinen 500-ge jýyq sportshy qatysýda.
