DZMU qoldaýymen Qazaqstanda tehnologııa men ınnovatsııa ortalyǵy qurylady
ASTANA. KAZINFORM — Memleket basshysy Dúnıejúzilik zııatkerlik menshik uıymynyń bas dırektory Daren Tangty qabyldady, dep habarlaıdy Aqordanyń baspasóz qyzmeti.
Áńgimelesý barysynda zııatkerlik menshik salasyndaǵy Qazaqstannyń áleýetin arttyrýǵa, ekojúıeni nyǵaıtýǵa jáne ornyqty bilim ekonomıkasyn qurýǵa baǵyttalǵan birlesken bastamalar talqylandy.
Qasym-Jomart Toqaev bolashaqqa baǵdarlanǵan ıntellektýaldy menshiktiń berik negizin qalaýda Uıym elimizdiń eń basty seriktesi ekenin atap ótti.
Qazirgi kezde zııatkerlik menshik quramdas bóligi bar Ulttyq ınnovatsııalyq strategııany ázirleý jobasy iske qosyldy. Bul ǵylymı zertteýlerdi yntalandyrýǵa, ozyq tehnologııalardy damytýǵa jáne jaǵymdy ınnovatsııalyq orta qalyptastyrýǵa baǵyttalǵan. Sondaı-aq Qazaqstan Uıymmen birlese otyryp, Tehnologııa men ınnovatsııany qoldaý ortalyǵy jobasyn júzege asyrady.
Daren Tang elimizde qabyldanǵan sharalardyń naqty nátıje berip jatqanyn aıtty. Byltyr Qazaqstan Jahandyq ınnovatsııalyq reıtıngtegi ornyn jaqsartqan bolatyn.
Buǵan deıin Memleket basshysy Google kompanııasynyń Ortalyq jáne Shyǵys Eýropa boıynsha vıtse-prezıdenti Patrık Vornkıngti qabyldaǵanyn jazǵanbyz.