Djýlı Stafft Qazaqstandaǵy AQSh-tyń jańa elshisi bolýy múmkin

ASTANA. KAZINFORM — Djýlı Staffttyń Qazaqstan Respýblıkasyndaǵy AQSh-tyń Tótenshe jáne Ókiletti Elshisi qyzmetine kandıdatýrasy Aq úıdiń resmı saıtynda jarııalandy, dep habarlaıdy Kazinform. 

Stafftpen birge Malaızııa, Shrı-Lanka jáne Taıland elderindegi elshi laýazymdaryna usynylǵan kandıdattar da kórsetilgen.

Qazirgi ýaqytta Djýlı Staffttyń kandıdatýrasy AQSh Senatyna joldanǵan. Elshilerdi taǵaıyndaý protsesi birneshe kezeńnen turady: aldymen kandıdatýrany prezıdent usynady, keıin ony Senattyń halyqaralyq ister jónindegi komıteti qaraıdy, qajet bolǵan jaǵdaıda tyńdaýlar uıymdastyrylady. Komıtettiń maquldaýynan keıin másele jalpy Senat otyrysynda daýysqa salynady.

Djýlı Stafft buǵan deıin AQSh-tyń Moldova, Djıbýtı, Reseı, Efıopııa jáne Polshadaǵy elshilikterinde jumys istegen. Sondaı-aq vızalyq qyzmetter jónindegi basqarýshy dırektor qyzmetin atqarǵan. 

Aıta keteıik, buǵan deıin Qazaqstandaǵy AQSh elshisi Denıel Rozenblıým otstavkaǵa ketkenin habarlaǵan bolatyn.