Djoshýa Povetkındi nokaýtqa túsirdi

ASTANA. QazAqparat - Londondaǵy «Ýemblı» arenasynda asa aýyr salmaqtaǵy álem chempıony Entonı Djoshýa men WBA Regular nusqasy boıynsha álemniń burynǵy chempıony Aleksandr Povetkın arasynda kásipqoı boks keshi ótti, dep habarlaıdy «SPORTINFORM» SAA shampionat.com saıtyna silteme jasap.

Atalmysh kezdesýdiń alǵashqy bóliminde boksshylar teń kele jatqan, alaıda Povetkın qarsylasyn alǵashqy raýndtyń sońynda ájeptáýir qaljyratyp tastady. Reseılik qashyqtyqty udaıy qysqartýǵa tyrysyp, búıir jaqtan soqqy jasaýǵa áreket jasady. Al Djoshýa reseılik boksshymen betpe-bet kelýge tyrysty.

Jetinshi raýndta Djoshýa belsendilik tanytyp, shabýyldy údete tústi jáne qatarynan birneshe soqqysyn darytyp úlgerdi. Nátıjesinde reseılik nokdaýnǵa túsip, ázer degende esin jıdy. Djoshýa bolsa shabýylyn odan saıyn kúsheıte túsip, Povetkınniń qorǵanýǵa shamasy kelmeı qaldy. Tóreshi saıysty toqtatýǵa májbúr boldy.