Djoshýa - Povetkın jekpe-jegi Golovkınniń tabysyn azaıtady

ASTANA. QazAqparat - Matchroom Boxing promoýterlik kompanııasynyń prezıdenti Eddı Hırn sýper aýyr salmaqtaǵy Entonı Djoshýa (21-0, 20 KO) jáne Aleksandr Povetkın (34-1, 24 KO) kezdesýiniń ótetinin resmı málimdedi, dep habarlaıdy Sports.kz.

Jekpe-jek 22 qyrkúıekte Londondaǵy «Ýemblı» stadıonynda ótedi. Onda qazir Djoshýanyń ıeleginde turǵan IBF, WBA Super, WBO jáne IBO tujyrymdary boıynsha álem chempıony beldigi sarapqa salynady.

Djoshýa - Povetkın jekpe-jegi Eýropa naryǵyna baǵyttalǵanmen, Gennadıı Golovkın (38-0-1, 34 KO) jáne Saýl Alvares (49-1-2, 34 KO) rematchynyń tabysyn birshama azaıtýy múmkin.

Aıta keteıik, Golovkın men Alvares arasyndaǵy alǵashqy jekpe-jek te osy sııaqty qaǵajý kórgen bolatyn. Sol kezdesý de Las-Vegasta, 16 qyrkúıekte bolǵan. Sonyń aldynda ǵana, 26 tamyzda Kishi Floıd Meıvezer (50-0, 27 KO) men UFC chempıony Konor Makgregordyń úlken shoýǵa aınalǵan jekpe-jegi ótken bolatyn.