Djordjııadaǵy orman órtteri 120-dan astam úıdi qıratty
ASTANA. KAZINFORM — AQSh-tyń Djordjııa shtatynda bolǵan eki iri orman órti saldarynan 120-dan astam turǵyn úı qırap nemese zaqymdandy, dep habarlaıdy Anadoly agenttigi.
Shtat bıliginiń málimetinshe, órtterdiń biri shtattyń ońtústik-shyǵysynda jalǵasyp jatyr. Jalyn shamamen 38 sharshy shaqyrym aýmaqty sharpyǵan. Qazirgi ýaqytta órt aýmaǵynyń nebári 10%-y ǵana baqylaýǵa alynǵan. Aldyn ala derekter boıynsha, osy órt saldarynan keminde 87 úı turýǵa jaramsyz bolyp qalǵan.
Mamandardyń aıtýynsha, órttiń shyǵýyna folgamen qaptalǵan áýe shary elektr jelilerine tıip, sonyń saldarynan paıda bolǵan elektr doǵasy sebep bolǵan. Bılik bul órtti shtat tarıhyndaǵy bir ǵana orman órti saldarynan turǵyn úı qoryna keltirilgen eń iri shyǵyn dep baǵalap otyr.
Ekinshi órt Florıda shtatynyń shekarasyna jaqyn jerde tirkelgen. Ol dánekerleý jumystary kezinde shyqqan ushqynnan tutanǵan. Órt shamamen 121 sharshy shaqyrym aýmaqqa taralyp, keminde 35 úıdi kúlge aınaldyrdy.
Qazirgi tańda Djordjııa shtatynda órt sóndirýshiler 150-den astam orman órtimen kúresip jatyr. Qalyń tútinge baılanysty keıbir aýdandarda aýa sapasynyń nasharlaýyna baılanysty eskertý jarııalanyp, turǵyndarǵa evakýatsııalaný usynyldy.
Tótenshe jaǵdaılar qyzmetiniń ókilderi kúshti jel jalynnyń odan ári taralýyna yqpal etýi múmkin ekenin eskertti.
Aıta keteıik, bıyl naýryzda AQSh-tyń Nebraska shtatyndaǵy orman órtinen 324 myń gektar jer janyp ketti.
