Djordja Melonı Toqaevqa alǵys bildirip, Qazaqstanmen seriktestikti nyǵaıtýǵa nıetti ekenin aıtty
ASTANA. KAZINFORM — Italııa Respýblıkasynyń Premer-mınıstri Djordja Melonı bul týraly áleýmettik jelidegi paraqshasyna jazdy.
Djordja Melonı Prezıdent Qasym-Jomart Toqaevqa shynaıy dostyq úshin alǵys bildirdi.
— Strategııalyq kózqarasy qalyptasqan ári bolashaqqa umtylatyn kóshbasshymen birge jumys isteý men úshin úlken qýanysh. Biz Italııa men Qazaqstan arasyndaǵy qarym-qatynasty nyǵaıtyp, energetıka men asa mańyzdy mıneraldyq resýrstardan bastap, joǵary bilim berý salasyndaǵy yntymaqtastyqqa deıingi baǵyttarda jańa strategııalyq múmkindikterge jol ashyp kelemiz.
Halyqtarymyzdyń ósip-órkendeýi men ál-aýqaty úshin osy joldaǵy jumystarymyzdy jalǵastyra beremiz, — dep jazdy ol.
Grazie Presidente @TokayevKZ per le parole di stima e per la sincera amicizia che ha sempre caratterizzato i nostri incontri.
— Giorgia Meloni (@GiorgiaMeloni) September 5, 2026
È un piacere lavorare con un leader che guarda al futuro con visione. Insieme stiamo rafforzando i rapporti tra Italia e Kazakistan, aprendo a nuove e… https://t.co/ky2VgybjE6
Eske salsaq, byltyr mamyr aıynda Italııa premeri Qazaqstanǵa resmı saparmen keldi.
Memleket basshysy Qasym-Jomart Toqaev Aqordada Qazaqstanǵa resmı saparmen kelgen Italııa Premer-mınıstri Djordja Melonıdi qarsy aldy. Keıinnen Qasym-Jomart Toqaev pen Djordja Melonı kelissóz júrgizdi.
Jalpy elordada ótken «Italııa — Qazaqstan» iskerlik forýmynda eki eldiń uıymdary jalpy somasy 180 mıllıon eýro bolatyn 10 memorandýmǵa qol qoıdy.
Italııa Premer-mınıstri Djordja Melonı Memleket basshysy Qasym-Jomart Toqaevty eń syndarly kóshbasshylardyń biri dep atady.
Aıta keteıik, 4 qyrkúıekte Djordja Melonı basqaratyn Italııa mınıstrler kabınetiniń úzdiksiz jumys istegenine 1 413 kún tolyp, Sılvıo Berlýskonıdiń ekinshi úkimetiniń qyzmet etý merziminen asyp túskeni belgili boldy. Osylaısha Melonı úkimeti Italııada bılik basynda bolý merzimi boıynsha rekord ornatty.
