Djordja Melonı: Orta dáliz — kóp úmit kúttiretin baǵyt

ASTANA. KAZINFORM — Italııa Italııa Mınıstrler keńesiniń tóraǵasy Djordja Melonı Memleket basshysy Qasym-Jomart Toqaevpen birge Astana halyqaralyq forýmynyń ekinshi kúninde plenarlyq sessııaǵa qatysyp, Ortalyq Azııa men Italııanyń qarym-qatynasy týraly oı qozǵady. 

— Ekologııalyq syn-qaterler de oıymda. Óıtkeni biz qazir Araldy qutqarý máselesine, Aral murasyna degen kúsh-jigerimizdi jańartyp jatyrmyz. Bul bizdiń paryzymyz jáne ony qorǵaý bizdiń mindetimiz. Italııanyń Klımattyq qory — osyndaı jobalardy júzege asyrýǵa paıdalanýǵa bolatyn mańyzdy qural, — dedi ol.

Mártebeli meıman Ortalyq Azııa men Italııa arasyndaǵy ózara yqpaldastyq tsıfrlyq ınfraqurylym men tasymal ınfraqurylymyna baǵyttalǵanyn atap ótti.

— Osyǵan baılanysty Orta dáliz eń keleshegi zor jáne eń tartymdy baǵyt bolyp esepteledi. Bul jobanyń jarııalanýy Eýropalyq Odaq pen Samarqandta bastama retinde kóterilgen strategııalyq yntymaqtastyqtyń ortalyǵynda bolyp, jetkizý tizbegi men turaqtylyqqa eleýli úles qosady dep senemiz, — dedi Italııa Mınıstrler keńesiniń tóraǵasy.

Aıta keteıik, keshe keshke Italııa premeri Qazaqstanǵa resmı saparmen keldi. 

Sondaı-aq, mártebeli meımannyń qatysýymen «Ortalyq Azııa — Italııa» sammıti ótedi. 

Eske salsaq, elordada kesheden beri Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.