Djordj Soros óziniń bıznes ımperııasyn basqarýdy ulyna tapsyrdy
VAShINGTON. QazAqparat – Amerıkalyq mıllıarder ári fılantrop Djordj Soros 25 mıllıard dollarlyq bıznes ımperııasyn basqarýdy 37 jastaǵy uly Alekske tapsyrdy, dep habarlaıdy QazAqparat VVS-ge silteme jasap.
Jeksenbi kúni Wall Street Journal gazetine bergen suhbatynda 92 jastaǵy qarjyger ulynyń buǵan ábden laıyq ekenin aıtty.
Aleks Soros – Djordj Sorostyń bes balasynyń biri, ol Nıý-Iorkte ósip, Berklıdegi Kalıfornııa ýnıversıtetinde tarıh ǵylymdarynyń kandıdaty dárejesin aldy.
Ótken jyldyń jeltoqsan aıynda ol Sorostyń basty jobasy – «Ashyq qoǵam» qoryn basqardy, sonymen qatar amerıkalyq saıası partııalardy qarjylandyrý jobalaryn úılestirdi.
Endi Aleks Soros basshylyq etetin «Ashyq qoǵam» qory burynǵydaı baspasóz bostandyǵyn qoldaý, sot tóreligi júıesin reformalaý, bosqyndardyń quqyǵyn qorǵaý, lıberaldyq saıasatkerlerdi qoldaý isin ary qaraı jalǵastyrady. Ol úshin álemniń 120 elinde jylyna bir jarym mıllıard dollarǵa jýyq qarajat jumsalady.
