Djordj Klýnı Baıdendi saılaýǵa túsýden bas tartýǵa shaqyrdy

ASTANA. KAZINFORM — Gollıvýdtyń áıgili akteri jáne Demokratııalyq partııa úshin qarajat jınaýshy Djordj Klýnı Djo Baıdendi AQSh-taǵy prezıdenttik jarystan shyǵýǵa shaqyrdy, dep habarlaıdy BBC.  

Akter prezıdent óz mansabynda kóptegen taıtalasta jeńiske jetkenin, «biraq ol jeńe almaıtyn jalǵyz báseke — ýaqyt ekenin, onymen kúrese almaıtynyn» málimdedi. 

Klýnı New York Times gazetinde «buny aıtý óte qorqynyshty» ekenin, biraq úsh apta buryn qarajat jınaý sharasynda kezdesken Djo Baıden 2010 jyldaǵydaı emes ekenin jazdy. 

«Ol tipti 2020 jylǵy Djo Baıden de emes. Bul bárimiz pikirtalasta kýá bolǵan adam edi. Partııa jetekshileri bizge ózimiz, ıaǵnı 51 mln adam kórip júrgen adamdy basqa adam dep aıtýdy doǵarýy kerek. Bul — jas máselesi. Basqa eshteńe joq. Biz qarasha aıynda myna prezıdentpen jeńiske jete almaımyz», — dep qosty Klýnı. 

Akter osy pikiri ol sóılesken kongrestiń ár múshesiniń alańdaýymen sáıkes keletinin aıtty. 

Buǵan deıin Ókilder palatasynyń burynǵy spıkeri Nensı Pelosı 81 jastaǵy Djo Baıdenniń Donald Tramppen sátsiz pikirtalastan keıin prezıdenttik jarysta qalý-qalmaý jóninde sheshim qabyldaýǵa «ýaqyty az» ekenin málimdegen. 

«Men prezıdenttiń saılaýǵa túsý-túspeý jóninde birjola sheshim qabyldaǵanyn qalaımyn. Ol qandaı sheshim qabyldasa da, bárimiz ony qoldaımyz, óıtkeni ýaqyt az qaldy», — dedi ol MSNBC arnasyndaǵy Morning Joe baǵdarlamasynda. 

Sonymen birge, qazirgi prezıdentke qoldaý kórsetýdi úzbegender arasynda Senattaǵy jetekshi demokrat Chak Shýmer, shamamen 60 saıasatkerden turatyn kongresmender toby, Aleksandrııa Okasıo-Kortes sııaqty progressıvti Ókilder palatasynyń músheleri bar.

Sondaı-aq, Kalıfornııa gýbernatory Gevın Nıýsom Baıdendi áli de «tolyq qoldaıtynyn» aıtty.