Djordj Floıdtyń ólimi: Polıtsııada qyzmet etken 4 adamǵa aıyp taǵyldy
Prokýratýra sondaı-aq taǵy úsh polıtsııa qyzmetkerine aıyp taqty, dep habarlaıdy QazAqparat bbc saıtyna silteme jasap.
Jarııalanǵan sot qujattaryna sáıkes, Shovınge ekinshi dárejedegi kisi óltirý áreketi boıynsha taǵy jańa aıyptar taǵylǵan. Ustaý kezinde bolǵan taǵy úsh polıtsııa qyzmetkerine adam óltirýge kómektesý jáne oǵan arandatý boıynsha aıyp taǵyldy.
Áýelde Shovınge úshinshi dárejedegi, ıaǵnı baıqaýsyzda kisi óltirý áreketi boıynsha aıyp taǵylǵan edi. Ekinshi dárejedegi kisi óltirý Amerıka zańnamalarynda ózgelermen kelisilmegen, biraq qasaqana kisi óltirý, densaýlyqqa qasaqana zııanyn tıgizý, adam ómirine degen nemquraıdylyq áreketi bolyp esepteledi.
Al Floıdtyń ólimine qatysty ózgeler polıtseılerge aldymen aıyp taǵylmaǵan bolatyn. Olar tek jumystan shyǵarylǵan edi. Biraq Floıdtyń jaqyndary olardy da jaýapqa tartýdy talap etti.
Endi Floıdtyń isi boıynsha 4 adamǵa aıyp taǵylyp otyr.
Reıter agenttiginiń habarlaýynsha, shtattyń Bas prokýrory úsh polıtseıdi tutqyndaýǵa order bergen.
Shovın ótken aptanyń sońynda tutqyndaldy. Mınnesota shtatynyń bas prokýrory Kıt Ellıson Fox News telearnasyna bergen suhbatynda 4 polıtseıge de eń joǵary jaza taǵaıyndalýy múmkin ekendigin málimdedi.
Eger olar barlyq baptar boıynsha aıypty dep tanylsa, uzaq merzimge sottalady jáne iri kólemde aıyppul tóleıdi. Ekinshi dárejedegi adam óltirý úshin 40 jylǵa deıin bas bostandyǵynan aıyrý jazasy qarastyrylǵan.
Polıtseılerdi qamaýdan bosatý úshin tólenetin kepil somasy – bir mıllıon dollar.
