Djonnı Depp resmı túrde úndis atandy
ASTANA. 24 mamyr.QazAqparat - Gollıvýd juldyzy Djonnı Depp resmı túrde komancha úndister taıpasynyń qataryna qabyldandy. Atalmysh rásim 16 mamyr kúni ótkizilgenimen, BAQ-ta bul týraly endi ǵana jazylyp otyr, dep jazady BNews.kz.
Gollıvýd juldyzyna taıpanyń qurmetti múshesi mártebesin berý saltanaty Albýkerkede, AQSh-taǵy komancha múddelerine ókildik etetin belsendi LaDonna Harrıstiń úıinde ótken, dep habarlaıdy Lenta.ru Reuters-ke silteme jasap.
Harrıstiń aıtýynsha, Deppti taıpanyń qataryna qabyldaý ıdeıasyn akterdiń ózi kótergen. Qoǵam qaıratkeri onyń týystarynyń biri Djonnı Depp túsip jatqan «Jalǵyz basty reındjer» fılminiń túsirý alańynda keńesshi bolyp jumys isteıtinin aıtty. Onda Depp komancha taıpasynan shyqqan Tonto esimdi úndisti oınaıdy. Sol týysqany Harrıs pen Depptiń kezdesýin uıymdastyrǵan.
Taıpa qataryna qabyldaný rásiminen keıin Depp qubylǵysh beıne degen maǵynany bildiretin Ma Vý Meı esimin ıelendi. Komancha taıpasynyń basshysy akterge qurmetti komancha mártebesiniń berilýin maquldaǵan. Saltanatty rásimnen keıin akter komancha taıpasynyń ǵana emes, sondaı-aq LaDonna Harrıs otbasynyń múshesi atandy.
Djonnı Depp Kentýkkı shtatynda dúnıege kelgen. Ol buǵan deıin óziniń arǵy atalarynyń arasynda baıyrǵy amerıkalyqtar, ıaǵnı chırok pen krık taıpalarynyń ókilderi bar ekendigin birneshe márte aıtyp ketken bolatyn.
«Jalǵyz basty reındjer» fılmi prokatqa 2013 jyly shyǵady. Rejısseri - Gor Verbınskı, al Deppten basqa kartına túsirilimine Ermı Hammer, Helena Bonem Karter, Ýılıam Fıhtner men Tom Ýılkınson qatysady.
Esterińizge sala ketsek, 2012 jyldyń qańtarynda Djonnı Depp álemdegi eń iri IMDb kıno týraly ınternet-bazasy tarıhyndaǵy eń tanymal akterler tizimin basqardy.
