Djon Ternýs Apple kompanııasynyń bas dırektory qyzmetine resmı túrde kiristi
ASTANA. KAZINFORM — 2026 jylǵy 1 qyrkúıekte Djon Ternýs amerıkalyq Apple korporatsııasynyń bas dırektory qyzmetine resmı túrde kiristi. Ol bul qyzmette Tım Kýktiń ornyna keldi, dep habarlaıdy Kazinform TASS-qa silteme jasap.
Kýk kompanııa dırektorlar keńesiniń atqarýshy tóraǵasy boldy. Apple kompanııasy basshylyqtaǵy ózgeris týraly 2026 jylǵy 20 sáýirde habarlaǵan.
Djon Patrık Ternýs 1975 jyly AQSh-tyń Kalıfornııa shtatynda dúnıege kelgen. 1997 jyly Pensılvanııa ýnıversıtetinde mashına jasaý mamandyǵy boıynsha bakalavr dárejesin aldy. Apple kompanııasyna kelgenge deıin Virtual Research Systems kompanııasynda ınjener-mehanık bolyp jumys istegen.
Ternýs Apple kompanııasyna 2001 jyly qosyldy. Alǵashynda ol apparattyq quraldardy ázirleýmen aınalysyp, sonyń ishinde Apple Cinema Display monıtorlarynyń jelisinde jumys istedi. 2013 jyly Ternýs Apple kompanııasynyń apparattyq quraldar jónindegi vıtse-prezıdenti atandy. Bul qyzmette ol iPad pen Mac qurylǵylaryn ázirleý jumystaryn basqardy, sondaı-aq AirPods jáne kompanııanyń basqa da ónimderin jasaýǵa qatysty.
2021 jyly Ternýs Den Rıchchıonyń ornyna apparattyq quraldardy ázirleý jónindegi aǵa vıtse-prezıdent qyzmetine taǵaıyndaldy. Ol iPhone, iPad, Mac, AirPods jáne Apple kompanııasynyń basqa da qurylǵylarynyń apparattyq bóligin ázirleýge jetekshilik etti. Sondaı-aq Mac kompıýterlerin kompanııanyń ózi ázirlegen protsessorlarǵa kóshirý úderisine belsendi qatysty.
Mansap jolynda ol iPhone, Mac, iPad jáne Apple Watch sııaqty ónim jelilerin ázirleý men damytý jumystaryn basqardy. Ternýs AirPods, sondaı-aq iPhone 17 serııasyn qosa alǵanda, iPhone-nyń keıingi býyndary, sonyń ishinde Pro, Pro Max jáne iPhone Air sııaqty jańa qurylǵylardyń tanystyrylymyna qatysty.
Eske salaıyq, buǵan deıin Apple qaıtadan álemdegi eń qymbat kompanııa atanǵanyn jazǵanbyz.
