Djon Soıers: Izraıldiń maqsaty – AQSh-ty qaqtyǵysqa tartý

ASTANA. KAZINFORM — AQSh prezıdenti Donald Tramp Irannyń ıadrolyq nysandaryna, sonyń ishinde Fordodaǵy ýran baıytý zaýytyna soqqy jasaý úshin Izraılmen birigýdi qarastyryp otyr, dep jazdy Kazinform tilshisi.

CBS arnasynyń (BBC-niń seriktesi) habarlaýynsha, bul taqyryp jaqynda Aq úıdegi Sıtýatsııalyq bólmede ótken Tramp pen AQSh Ulttyq qaýipsizdik keńesiniń kezdesýinde talqylanǵan.

CBS-tiń derekkózderi Tramptyń eń jaqyn keńesshileri bul másele jóninde ortaq pikirge kele almaı otyrǵanyn aıtady.

Ulybrıtanııanyń syrtqy barlaý qyzmeti — MI6-tyń burynǵy basshysy Djon Soıers BBC-ge bergen suhbatynda Izraıl Irandaǵy keıbir asa mańyzdy ıadrolyq nysandarǵa shabýyl jasamaǵanyn, óıtkeni olar tereń jerasty bekinisterinde ornalasqanyn aıtty.

— Mundaı nysandarǵa soqqy jasaýǵa tek amerıkalyqtardyń ǵana áskerı múmkindigi bar, — dedi Soıers.

Onyń aıtýynsha, Vashıngton aldynda eki jol tur: ne Izraılmen birigip, bastalǵan isti sońyna deıin jetkizý, ne dıplomatııalyq sheshim izdeý.

Soıers Izraıldiń basty maqsaty — AQSh-ty Iranmen qaqtyǵysqa tartý ekenin aıtady. Osylaısha Izraıl AQSh-tyń áskerı qýatyn paıdalanyp, Irannyń ıadrolyq ınfraqurylymyn joımaq.

Aıta keteıik, dúısenbi kúni Donald Tramp Kanadada ótip jatqan G7 sammıtinen merziminen buryn Vashıngtonǵa oralý týraly sheshim qabyldady. Bul sheshim Taıaý Shyǵystaǵy jaǵdaıdy baqylaýǵa alý maqsatynda jasalǵan. AQSh Taıaý Shyǵysqa «USS Nimitz» áýe tasymaldaýshy kemesin jóneltti. Buǵan deıin Axios basylymy Izraıldiń AQSh-ty Iranǵa qarsy soǵysqa tartýǵa tyrysyp jatqanyn habarlaǵan bolatyn.

Buǵan deıin habarlanǵandaı, Netanıahý men Tramp telefon arqyly sóılesti.

Al Eýropalyq dıplomatııa basshysy Kaıa Kallas AQSh-tyń aralasýy Taıaý Shyǵystaǵy qaqtyǵystyń órshýine ákeletinin aıtty.