Djohar Tsarnaev AQSh bıligin 11 qyrkúıektegi teraktini uıymdastyrdy dep aıyptady
ASTANA. QazAqparat - Amerıka bıligimen ótken jyldyń sáýir aıynda Bostondaǵy marafonda jarylys uıymdastyrdy dep aıyptalyp otyrǵan Djohar Tsarnaev 2001 jyly 11 qyrkúıekte bolǵan teraktini AQSh úkimeti uıymdastyrdy dep málim etken. Bul týraly Bostondaǵy sot otyrysynda onyń burynǵy bólmeles zamandasy Endrıý Dvınells aıtty.
Ol qorǵaýshy taraptan kýáger retinde marafondaǵy teraktini tergeýge kedergi keltirdi dep aıyptalyp otyrǵan qazaqstandyq stýdent Azamat Tajaıaqovtyń isi boıynsha sot tyńdaýlaryna qatysýda. Dvınellstiń aıtýynsha, Tsarnaev 11 qyrkúıektegi terrorlyq shabýyldar týraly derekti fılmdi kórip otyryp, bul AQSh úkimetimen uıymdastyrylǵan qastandyqtyń nátıjesi degen. Sondaı-aq Dvınells Tsarnaevtyń eshqashan da ekstremıstik pikirler bildirmegenin atap ótti. Dvınells Tájaıaqovtyń qorǵaýshysy tarapynan aıtylǵan qazaqstandyq stýdenttiń Tsarnaevtyń bólmesinen oǵan ózi ýaqytsha paıdalana turýǵa bergen qulaqqaptaryn ǵana alyp shyqqany týraly ýájin naqtylady. Aıta keteıik, qorǵaýshylar Tájaıaqovtyń Tsarnaevtyń bólmesinen pırotehnıka salynǵan rıýkzakty alyp shyqpaǵanyn, bul iske basqa qazaqstandyq stýdent - Dıas Qadyrbaevtyń qatysy baryn dáleldeýge kúsh salǵan edi.
Eger stýdentterdiń kinálary dáleldenetin bolsa, olar 25 jylǵa deıin bas bostandyqtarynan aıyrylýy múmkin. Alaıda olar ózderin aıypty dep sanamaıdy. Qadyrbaevqa qatysty sot isi aǵymdaǵy jyldyń qyrkúıek aıynda bastalady, dep habarlaıdy ITAR-TASS.
