Djo Baıden Mıchıganda ereýilshilerge qosylyp, olarǵa qoldaý bildirdi
AQSh prezıdenti Djo Baıden Mıchıganǵa sapary kezinde ereýilge shyqqan avtoónerkásip salasynyń ókilderine qosylyp, olardy qoldaıtynyn bildirdi. QazAqparat bul týraly VVS-ge silteme jasap habarlaıdy.
Buǵan deıin AQSh-tyń is basyndaǵy birde-bir prezıdenti ereýilshilerdi qoldaýǵa táýekel etpegen edi.
Baıden Mıchıganǵa aldaǵy prezıdenttik saılaýdaǵy yqtımal qarsylasy Donald Tramptyń osy óńirge saparyna bir kún qalǵanda keldi jáne narazylyqqa qatysýshylar prezıdenttikke yqtımal kandıdattar olardyń óz quqyqtary úshin kúresin saıasattandyryp jiberedi dep qaýiptenedi.
Djo Baıden ereýilshilerge qarata aıtqan sózinde olar «jalaqy men basqa da jeńildikterdiń aıtarlyqtaı ósýine laıyq» ekenin atap ótti.
Jekelegen adamdar Baıden men Tramptyń saparyna qarsylyǵyn ashyq bildirip jatty. «Olardyń eshqaısysy munda kelmegeni jaqsy bolar edi. Biz bólinýdi qalamaımyz, al saıasat aralasqan kezde kelispeýshilikter bastalady», – deıdi mıtıngige qatysýshylardyń biri.
Amerıka avtokólik jumysshylary odaǵynyń (UAW) músheleri úsh iri kompanııa – Ford, General Motors jáne Stellantis-ten jalaqyny kóterýdi, eńbek jaǵdaıyn jaqsartýdy talap etýde.
