Djo Baıden men Sı Tszınpın Kalıfornııada kezdesti
AQSh prezıdenti Djo Baıden men Qytaı tóraǵasy Sı Tszınpın Azııa-Tynyq muhıty elderiniń ekonomıkalyq yntymaqtastyǵy jyl saıynǵy sammıti (ATES) aıasynda jabyq esik jaǵdaıynda kelissóz júrgizdi. Kazinform agenttiginiń tilshisi bul týraly NBC News-ke silteme jasap habarlaıdy.
Djo Baıden Sı Tszınpındi Kalıfornııadaǵy (AQSh) Výdsaıd qalasynyń «Filoli Estate» murajaı úıiniń janynda tóselgen qyzyl kilemde qarsy aldy. Amerıka prezıdenti qytaılyq áriptesin qarsy alý úshin ǵımarattan birinshi bolyp shyqty. Sı Tszınpın kelgen soń eki kóshbasshy sammıt ǵımaratyna kirer aldynda qol alysyp amandasty.
Sóz basynda Djo Baıden Sı Tszınpınge AQSh-qa sapary úshin alǵys aıtyp, Qytaı basshysymen Balıdegi sońǵy kezdesýin eske aldy.
Amerıka prezıdenti sondaı-aq kóshbasshylar básekelestiktiń ýshyǵyp, qaqtyǵysqa aınalýyna jol bermeý úshin kúsh salýy kerek ekenin atap ótti.
«Men bizdiń áńgimemizdi baǵalaımyn, sebebi siz jáne men bir-birimizdi kóshbasshy retinde jaqsy túsinýimiz kerek dep oılaımyn. Bul rette biz eshqandaı qatelikke, jol bermeýimiz kerek», - dedi Djo Baıden.
Aq úı basshysy kóshbasshylardyń óz qaýymdastyqtary aldynda birlesip jumys isteýge, sonyń ishinde klımattyń ózgerýi, esirtkiniń zańsyz aınalymyna qarsy turýǵa jáne jasandy ıntellekt tásilderine jaýapty ekenin atap ótti.
Sı Tszınpın bir jyl buryn Balıde AQSh prezıdenti Djo Baıdenmen sońǵy kezdeskenin, odan beri álem ózgergenin atap ótti.
«Álem Covid-19 indetinen aıyqty, biraq onyń áli de úlken áseri bar. Álemdik ekonomıka qalpyna kele bastady, biraq onyń qarqyny baıaý», - dedi Sı Tszınpın.
Sı Tszınpın Qytaı men AQSh arasyndaǵy qarym-qatynasy sońǵy 50 jylda jaıly bolmaǵanyn, alaıda olar barlyq kedergiler men qıyndyqtardy eńsere otyryp alǵa jyljyp kele jatqanyn atap ótti.
«Bir tarap ekinshisin ózgertýi múmkin emes, al qaqtyǵystar men konfrontatsııa eki tarap úshin de aýyr zardaptarǵa ákeledi», - dedi Sı Tszınpın.
Qytaı basshysy sammıt barysynda túrli álemdik máseleler boıynsha pikir almasýǵa úmit bildirdi.
Eki kóshbasshy da kirispe sóz sóılegennen keıin kezdesýdi bastaý úshin baspasóz ókilderi zaldan shyǵaryldy. Eki basshy da ákimshiliktiń kóptegen joǵary laýazymdy sheneýnikterimen uzyn ústel basyna otyrdy.
Kezdesý jergilikti ýaqyt boıynsha saǵat 11:23-te bastaldy.
