Djo Baıden Meksıkamen shekaradaǵy qabyrǵa qurylysyn jalǵastyrady

AQSh prezıdenti Djo Baıden ákimshiligi Meksıkadan keletin zańsyz ımmıgratsııa aǵynyn toqtatý úshin ońtústik Tehasta 30 shaqyrymdyq shekara qorǵanyn salýdy sanktsııalady. QazAqparat bul týraly VVS agenttigine silteme jasap habarlaıdy.

Baıden qyzmetine kirise sala Donald Tramp kezinde bastalǵan shekara qorǵany qurylysyn toqtatty. Bul onyń saılaýaldy naýqanyndaǵy negizgi pýnktilerdiń biri bolatyn. Ol “meniń ákimishiligim turǵan kezde birde-bir fýt qabyrǵa salynbaıdy” dep ýáde berdi.

2021 jyldyń 20 qańtaryndaǵy qurylysty toqtatý týraly málimdemede “ońtústik shekarany túgel qamtıtyn alyp qorǵan qurylysy mańyzdy saıası sheshimge jatpaıdy” delingen.

Degenmen sársenbi kúni Baıden ákimshiligi qurylysty jalǵastyrý úshin Tehastyń ońtústiginde 26 federaldy zańnyń jumysyn toqtata turatynyn málim etti.

Іshki qaýipsizdik mınıstrligi AQSh Federaldy reestrinde sáıkes málimdeme jarııalady.

Mınıstrlik sheshimimen kúshi toqtatyla turǵan federaldyq zańdar qatarynda Taza aýa týraly zań, Qaýipsiz aýyzsý týraly zań jáne Joǵalyp bara jatqan túrler týraly zań bar. Bul ekologııa zańnamasyna qatysty uzaq tekseris pen sot aralasýyn boldyrmaýǵa múmkindik beredi.

"AQSh shekarasyna jaqyn mańda Qurama Shtattardyń jobalyq aýdandaryna zańsyz kirýdiń aldyn alý úshin kedergi men joldardyń salynýy asa qajet jáne keıinge qaldyrýǵa bolmaıtyn jumys", - dep málimdedi ishki qaýipsizdik mınıstri Alehandro Maıorkas.

Aldyn ala derekter boıynsha, bıylǵy jyly quramyna 21 okrýg kiretin Rıo-Grande alqabynda 245 adam shekarany zańsyz kesip ótpek bolǵan.

"Kongress Rıo-Granda alqabyndaǵy shekara qorǵany qurylysyna 2019 jyly qarjy bólgen bolatyn, bıyl mınıstrlik osy qarajatty qajet jerine jaratýy kerek", - delingen AQSh Shekara qyzmeti málimdemesinde.