Djo Baıden Izraılge ushyp shyqty

AQSh basshysy Djo Baıden Gaza sektoryndaǵy aýrýhanaǵa zymyranmen jasalǵan soqqydan keıin Izraılge attandy, dep habarlaıdy Kazinform.

«Iordanııa koroli ІІ Abdallamen keńesten keıin jáne Palestına avtonomııasynyń basshysy Mahmýd Abbastyń qaraly kún jarııalaýyna baılanysty, prezıdent Baıden Iordanııaǵa saparyn keıinge qaldyrdy», - dep keltiredi Aqúıdiń málimetin «Golos Amerıkı» basylymy.

D.Baıden Izraılge ushyp shyqty jáne búgin atalǵan elde bolýy tıis.

Eske salaıyq, keshe Gaza aýrýhanasyna áýeden soqqy jasalyp, saldarynan júzdegen adam kóz jumdy. Keıingi málimetke sáıkes, olardyń sany 800-den asty.

Palestına prezıdenti Mahmýd Abbas úshkúndik qaraly kún jarııalady. Al Mayadeen telearnasynyń dereginshe, ol 19 qazanǵa AQSh basshysy Djo Baıdenmen josparlanǵan kezdesýin kútpesten Ammannan ushyp ketip, Ramallaǵa oralǵan.

HAMAS aýrýhanaǵa shabýylǵa Izraıldi kinálap otyrsa, ızraldik bılik buǵan palestınalyq anklavtan sátsiz ushyrylǵan zymyrandar sebep bolǵanyn jáne oǵan “Islam jıhady” jaýapty ekenin aıtýda.