Djo Baıden Izraıl men HAMAS arasyndaǵy bitim merzimi uzartylatynynan úmitti
AQSh prezıdenti Djo Baıden Izraıl men HAMAS uıymynyń soǵysty ýaqytsha toqtatý sheshimin qoldaýǵa shaqyrdy. Kazinform agenttiginiń tilshisi bul týraly Aq úıge silteme jasap habarlaıdy.
Djo Baıden bolashaqta AQSh «Taıaý Shyǵystaǵy zorlyq-zombylyq tsıklyna» núkte qoıýy tıis ekenin atap ótti.
«Biz ızraıldikter men palestınalyqtardyń teń bostandyq pen qadir-qasıetke ıe eki memleket týraly kelisim aıasynda ómir súre alatyn sheshimge umtylýdaǵy jigerimizdi rastaýymyz kerek. Eki halyqqa – eki memleket. Bul qazir burynǵydan da mańyzdy», - dedi Djo Baıden.
AQSh basshysy soǵys qımyldaryn toqtatýdy eki sebep boıynsha dáıekti túrde alǵa tartqanyn aıtty: Gazaǵa gýmanıtarlyq kómek jetkizýdi keńeıtý úshin jáne tutqyndardy bosatýǵa kómektesý úshin.
Sońǵy birneshe apta ishinde Djo Baıden soǵysty ýaqytsha toqtatý úshin Katar ámiri, Mysyr prezıdenti jáne Izraıldiń premer-mınıstrimen birneshe ret áńgimelesti. AQSh prezıdenti osy elderdiń kóshbasshylaryna bul maqsatqa qol jetkizýdegi seriktestigi úshin alǵysyn bildirdi.
Soǵys áreketterin toqtatý zardap shekkenderge gýmanıtarlyq kómek jetkizýge múmkindik berip otyr. Mysyrdan palestınalyqtarǵa azyq-túlik, dári-dármek, janarmaı jáne gaz jetkizý úshin baqylaý-ótkizý pýnktine 200-den astam júk kóligi jiberildi.
Baıdenniń atap ótýinshe, aldaǵy kúnderi ol búkil Taıaý Shyǵystaǵy kóshbasshylarmen ózara árekettestikti jalǵastyrady. Mundaǵy onyń maqsaty – aımaqta evreı, musylman, hrıstıan, ızraıldik, palestınalyq, arabtyń ár balasy jerdi erkin basatyndaı beıbitshilikti qalpyna keltirý.
Katar SІM habarlamasyna sáıkes, Gazadaǵy soǵys qımyldaryn toqtatý rejımi 24 qarasha tańynda bastaldy. Keshe Izraıl men HAMAS bitimdi taǵy eki kúnge sozý týraly kelisti.
