Djo Baıden Donald Tramptyń kóptegen sheshiminiń kúshin joıdy

NUR-SULTAN. QazAqparat – Djo Baıden Prezıdent laýazymyna kirisken alǵashqy kúni-aq ózine deıin Memleket basshysy bolǵan Donald Tramptyń birqatar sheshimin joıatyn Jarlyqtar toptamasyna qol qoıdy, dep habarlaıdy QazAqparat tilshisi «Amerıka daýysynyń» jańalyqtar qyzmetine silteme jasap.

Aq úıdiń jańa basshysy AQSh-tyń Klımat jónindegi Parıj kelisimine qosylýy týraly jarlyǵyn shyǵardy. Este bolsa, Donald Tramp bılikke kelgen kezde el atalǵan kelisimnen shyǵyp ketken bolatyn. Buǵan qosa, Baıden Tramptyń Dúnıejúzilik densaýlyq saqtaý uıymynan shyǵý, AQSh-qa ásirese musylman turǵyndary basym elderden kelýshilerge tyıym salý syndy sheshimderiniń kúshin joıdy.

AQSh Prezıdenti kómekshileriniń málimetinshe, aldaǵy ýaqytta Djo Baıden AQSh pen Meksıka shekarasynyń boıyn jaǵalaı qabyrǵa qurylysyn toqtatady. Sonymen qatar bilim alýǵa iri kólemde ssýda alǵan stýdentterge kómek kórsetip, aldaǵy 8 aıdyń ishinde paıyzsyz negizgi somany tóleýge múmkindik beredi. Munan bólek, aldaǵy 10 kúnniń ishinde Baıden Kongrestiń maquldaǵanyn kútpesten Tramptyń taǵy da ondaǵan sheshimin joıý týraly sheshim qabyldamaq.

Human Rights First táýelsiz quqyq qorǵaý uıymy jańa Prezıdent Baıdenniń ásirese musylman turǵyndary basym elderden AQSh-qa kelýshilerge tyıym salý sheshimin alyp tastaǵanyn qoldap otyr. Al Kalıfornııadan saılanǵan demokrat senator Daıan Faınsteın Baıdenniń eldiń kóshi-qon júıesin «ashyq jáne ádil» jasaý úshin ózgertýge umtylysyn jaqtady. Alaıda Ókilder palatasyndaǵy respýblıkashylardyń kóshbasshysy Kevın Makkartı Baıdenniń ımmıgratsııalyq jospary pandemııa kezinde kúrdelene túsken amerıkalyqtardyń problemalaryn eskermeıdi, jyldar boıy AQSh-tyń zańnamasyn buzyp kelgen zańsyz ımmıgranttardyń problemasyn sheshýge baǵyttalǵan dep sanaıtyndyǵyn bildirdi.