Djo Baıden Alıaskada munaı óndirý týraly daýly jobany maquldady

ASTANA. QazAqparat – Djo Baıden ákimshiligi Alıaskadaǵy «Ýılloý» munaı uńǵymasyn burǵylaý aýqymdy jobasyn maquldap, qorshaǵan orta qorǵaýshylarynyń narazylyǵyn týdyrdy, dep habarlaıdy QazAqparat CNN-ge silteme jasap.

«Ýılloý» jobasy – Alıaskadaǵy federaldyq úkimetke tıesili Ulttyq munaı qoryndaǵy munaı uńǵymasyn burǵylaıtyn kópjyldyq mekeme.

Joba josparlanǵan aýdanda 600 mln barrel munaı bar. Bul munaı naryqqa jetý úshin jyldar kerek, sebebi joba áli júzege asqan joq. Zertteýshilerdiń boljamynsha, alyp jobany iske asyrsa qorshaǵan ortaǵa jylyna 9,2 mln metrlik tonna kómirqyshqyl gazy shyǵady, ol ǵalamdyq jylynýǵa aıtarlyqtaı áser etedi.

Óz kezeginde Alıaska bıligi jobanyń maquldanǵanyna qýandy, sebebi bul qajetti jańa kiris kózi jáne shalǵaı aımaqtaǵy jańa jumys ornyn ashýǵa múmkindik. Klımattyq toptar men Alıaskanyń burynnan kele jatqan turǵyndary oqıǵany soqqy retinde qabyldady. Olar joba bıoapat týdyrýy múmkin, sonymen qatar, densaýlyq pen qorshaǵan ortaǵa qaýip tóndiredi dep esepteıdi.

Jobaǵa qarsylyq retinde Aq úıge mıllıonnan asa hat joldandy, sondaı-aq Change.org saıtynda mıllıondaǵan qol jınaǵan petıtsııa iske qosyldy.