Djo Baıden AQSh prezıdenti atanýǵa qajet daýysty jınady - CNN
VAShINGTON. QazAqparat - Amerıka Qurama Shtattarynda ótip jatqan prezıdent saılaýynda demokratııalyq partııa atynan baq synaǵan Djo Baıden jeńiske qajet daýysty jınady, dep habarlaıdy QazAqparat CNN agenttigine silteme jasap.
CNN men AP málimetinshe, saılaý barysynda 77 jastaǵy Baıden tańdaýshylardyń 273 daýsyn jınap, Amerıkanyń qazirgi prezıdenti, respýblıkalyq partııa úmitkeri Donald Trampty basyp ozǵan.
Sózsiz prezıdent ataný úshin kandıdattar kem degende 270 daýys jınaýy tıis. Baıden Pensılvanııa shtatynda ózine jetpeı turǵan daýys kólemin jınap, qarsylasynan qara úzip ketti.
Saılaýdyń sońǵy qorytyndy nátıjesi 14 jeltoqsannan keıin belgili bolady.
Aıta ketý kerek, bul saılaýda Djo Baıden AQSh tarıhynda osy laýazymǵa úmitker bolǵan búkil kandıdattardan kóp daýys jınady. AP málimetine sensek, qazirgi tańda sanalǵan bıýlletenderdiń 74,8 mıllıony Baıdenge daýys bergen. Al 70,5 mıllıon saılaýshy Donald Trampty qoldaǵan.
Amerıkanyń eks-prezıdenti Barak Obama 2008 jyly 66 mıllıon daýys jınasa, qazirgi prezıdent Donal Tramp 2016 jyly 62 mıllıon saılaýshynyń senimine ıe bolǵan edi. Demek, Baıden buǵan deıingi rekordtyń bárinen basym túsip otyr.
Degenmen, ereje boıynsha prezıdent saılaýynyń jeńimpazy saılaýshylardyń emes, tańdaýshylardyń daýsyna qaraı belgili bolady.
2009 jyly Djo Baıden Amerıkanyń 47-shi vıtse-prezıdenti atanyp, Barak Obamamen birge qyzmetine kirisken bolatyn. Ol 2017 jylǵa deıin osy laýazymda eńbek etti. Oǵan deıin Baıden 35 jyl boıy Delaver shtaty atynan senator bolǵan.
