Djo Baıden 81 jasqa toldy
Amerıka prezıdenti Djo Baıden 81 jasqa tolǵan týǵan kúnin Aq úıdiń dástúrine saı atap ótýde – búgin Alǵys aıtý kúni qurmetine kúrketaýyqtarǵa raqymshylyq jasaldy. Kazinform bul týraly Associated Press-ke silteme jasap habarlaıdy.
Dúısenbi kúni Alǵys aıtý kúnine oraı eki kúrketaýyq Aq úıge jetkizildi. Onda D.Baıden qustardy bul merekede áldekimniń keshki asyna aınalý taǵdyrynan «qutqardy».
Kúrketaýyqty "ólimnen qutqarý" dástúri elde 1947 jyly bastaý alǵan. Ol kezde Ulttyq kúrketaýyq federatsııasy AQSh prezıdenti Garrı Trýmenge Alǵys aıtý kúnine oraı alǵash ret kúrketaýyqty syıǵa tartqan.
Kúrketaýyq Alǵys aıtý kúninde otbasylyq keshki astyń basty taǵamy sanalyp keldi. Alaıda 1980 jyldyń sońyna qaraı bul dástúr ázildi rásimge aınaldy. Onyń barysynda kúrketaýyqqa atalǵan mereke qurmetine «keshirim» berilip, ómir súrýge ekinshi múmkindik beriledi.
Djo Baıden – AQSh tarıhyndaǵy eń kári prezıdent. Ol búgin 81 jasqa tolǵan týǵan kúnin atap ótýde. 36 jyl boıy AQSh senatynda Delaver shtatynan ókil boldy. Odan keıin – 2009-2017 jyldar aralyǵynda (Barak Obama ákimshiliginde) 47-shi vıtse-prezıdent qyzmetin atqardy. 2021 jyldyń 20 qańtarynan Amerıkanyń is basyndaǵy basshysy.
