Djıý-djıtsýdan Qazaqstan quramasy Ábý-Dabıde ótken álem chempıonatynda 51 nagrada enshiledi
Búgin elimizdiń mádenıet jáne sport mınıstrliginde álemdik birinshilikte jeńimpaz atanǵan sportshylarǵa qurmet kórsetildi, dep habarlady vedomstvonyń baspasóz qyzmetinen.
Álem chempıonaty men onyń aıasynda ótken jarystarǵa álemniń 100 elinen 5 myńnan astam sportshy qatysqan.
Mádenıet jáne sport mınıstri Arystanbek Muhamedıuly Qazaqstan quramasynyń jattyqtyrýshylar shtabyna halyqaralyq sporttyq arenada elimizdiń atyn shyǵaryp júrgen talantty jas sportshylardy daıyndaǵandary úshin alǵysyn bildirdi.
«Djıý-djıtsý álemde keńinen tanymaldyqqa ıe bolyp keledi. Bizdiń sportshylarymyz óz sheberlikteriniń óte joǵary deńgeıin osy chempıonattan bólek basqa da jarystarda da kórsetip keledi. Biz sizderdiń jeńisterińizdi maqtan tutamyz», - dedi mınıstr.
Ol respýblıkalyq djıý-djıtsý qaýymdastyǵynyń bul sport túrin halyqtyń, ásirese el jastarynyń arasynda tanymaldyǵyn arttyrý baǵytynda júrgizip jatqan jumystaryna joǵary baǵa berdi.
Shara barysynda Qazaqstan quramasynyń múshesi ári Astana qalasynyń jattyqtyrýshysy Qanat Alın álemdik birinshilikten alǵan áserimen bólisti.
«Djıý-djıtsýdan álem chempıonaty 2009 jyldan beri jyl saıyn Ábý-Dabıde ótkizilip keledi. 2013 jyly men elimiz úshin alǵash ret 3 qola medal jeńip alǵan edim. Jyldan-jylǵa bul sporttyń qazaqstandyq arasyndaǵy tanymaldyǵy arta túsýde. Eger, 2014 jyly bizdiń elimizden álem birinshiligine 30 adam qatyssa, osy joly jarysqa 130 adam bardy», - dedi ol.
